शाम सवेरा - Sham Savera

Sham Savera in English

वेळ: कोफ्त्यासाठी ४० मिनिटे | ग्रेव्हीसाठी ३० मिनिटे.
वाढणी: २ ते ३ जणांसाठी

साहित्य:

कोफ्त्यासाठी

१ मोठी जुडी पालक
४ ते ५ टेस्पून बेसन
३ हिरव्या मिरच्या, पेस्ट करून
१/२ टीस्पून जिरेपूड
चवीपुरते मीठ
१ कप किसलेले पनीर
१/४ टीस्पून वेलचीपूड
कोफ्ते तळण्यासाठी तेल
२ टीस्पून तेल
२ टेस्पून कॉर्न स्टार्च

माखनी ग्रेव्हीसाठी

५ मोठे टोमॅटो, लालभडक आणि पूर्ण पिकलेले
१ टीस्पून गरम मसाला
१ टेस्पून आलेलसूण पेस्ट
१ टीस्पून लाल तिखट
१ टीस्पून काश्मिरी लाल तिखट किंवा लहान चिमटी खायचा लाल रंग
१ टीस्पून धणेपूड
१/२ टीस्पून कसूरी मेथी
१/२ टीस्पून जिरेपूड
२ टीस्पून लिंबाचा रस (टीप २ पहा)
१/४ ते १/२ कप क्रीम किंवा फेटलेली साय
चवीपुरते मीठ
२ टेस्पून बटर
१/२ टीस्पून साखर किंवा चवीनुसार (ऐच्छिक)

कृती:

माखनी ग्रेव्ही:

1) टोमॅटो मायक्रोवेव्हसेफ मोठ्या भांड्यात ठेवून त्यात टोमॅटो बुडतील इतपत पाणी घालावे. ५ ते ६ मिनिटे मायक्रोवेव्हमध्ये शिजवा. पाणी काढून टोमॅटो मिक्सरमध्ये वाटावे. गाळून त्यातील साले आणि बिया काढून टाकाव्यात.
२) पॅनमध्ये बटर गरम करावे. त्यात आलेलसूण पेस्ट आणि लाल तिखट घालावे. १०-१५ सेकंद परतून त्यात टोमॅटो प्य्रुरी, धने-जिरेपूड, कसुरी मेथी, मीठ आणि लिंबाचा रस घालावा. १० मिनिटे कमी आचेवर शिजवावे. मध्येमध्ये तळापासून ढवळा.
३) टोमॅटोचा कच्चा वास गेला कि गॅस बंद करा. ग्रेव्ही १-२ मिनिटे निवळू द्यावी. नंतर मिक्सरमध्ये हि ग्रेव्ही घालावी. ब्लेंड करावी. ब्लेंड करताना थोडे थोडे हेवी क्रीम घालत ब्लेंड करावे. ग्रेव्ही साधारण १ ते २ मिनिटे ब्लेंड करावी.
४) गुळगुळीत वाटलेली ग्रेव्ही पुन्हा पॅनमध्ये घालावी. साखर घालावी. मंद आचेवर ५ मिनिटे शिजू द्यावी.

कोफ्ते:

१) पालकाची पाने खुडून स्वच्छ धुवावीत. एक मोठे थंडगार पाण्याने भरलेले भांडे तयार ठेवावे. एक मोठे खोलगट पातेले घ्यावे. त्यात ३ ते ४ लिटर तरी पाणी उकळावे. या उकळत्या पाण्यात पालकाची पाने घालावीत. २ मिनिटे उकळी काढावी. चाळणीवर ओतून गरम पाणी काढून टाकावे आणि पाने थंड पाण्यात घालावी. म्हणजे रंग छान टिकून राहतो आणि गार पाण्यात शिजण्याची प्रोसेस थांबते. नंतर पालकाचे पाने दोन्ही हातात दाबून त्यातील पाणी काढून टाकावे..
२) कढईत २ टीस्पून तेल गरम करावे. त्यात जिरे आणि मिरचीचा ठेचा घालावा. यात बेसन घालून रंग खुलून येईस्तोवर परतावे. यावेळी बेसनाचा छानसा सुगंध येईल. यात चिरलेली पालकाची पाने घालावीत. मीठ घालून मिक्स करावे. मिश्रण कोरडे आणि घट्टसर होईस्तोवर परतावे.
३) एका दुसऱ्या वाडग्यात पनीर, वेलची पूड, आणि मीठ असे मिक्स करावे.
४) पनीर आणि पालकाचे मिश्रण ६-६ समान भागात विभागून घ्यावे. पालकच्या मिश्रणाचा एक भाग घेउन हातावर पसरवून पारी तयार करावी (काळजीपूर्वक करावे. खूप पातळ करू नये, थोडे जाडसर ठेवावे.) त्याच्या मध्यभागी पनीरचे मिश्रण ठेवावे. आणि पालकाची पारी बंद करून गोळा तयार करावा. असे सर्व ६ कोफ्ते बनवून घ्यावे. हे कोफ्ते कॉर्न स्टार्चमध्ये घोळवून घ्यावेत. हातावर हलकेच धक्क्याने अधिकचे पीठ काढून टाकावे.
५) हे कोफ्ते गरम तेलात मध्यम आचेवर तळून घ्यावे. गोल्डन ब्राउन रंग येईस्तोवर तळावे. हे कोफ्ते धारदार सुरीने मधोमध कापावे.
६) सर्व्हिग प्लेटमध्ये गरम केलेली ग्रेव्ही घालावी. त्यावर कोफ्त्याचा पांढरा भाग वर येईल असे ठेवावे. पुलाव, जीरा राईस किंवा नान, रोटी अशा पंजाबी पद्धतीच्या इंडिअन ब्रेडबरोबर सर्व्ह करावी.

टीपा:
१) थोडीशी साखर घातल्याने हलकिशी गोड चव येते आणि ती चांगली लागते.
२) टोमॅटो जर आंबट असतील तर लिंबाचा रस घालू नये किंवा कमी घालावा.
३) लिंबाच्या रसाऐवजी चिमूटभर सायट्रिक acid छान लागते.
४) काजूची १/४ कप घट्ट पेस्ट घातल्यास चव छान येते आणि घट्टपणाही येतो.

from: www.sanjeevkapoor.com

काजूची उसळ - Kaju Usal

Cashew Curry in English

वेळ: २० मिनिटे
वाढणी: ३ जणांसाठी

साहित्य:
पाव किलो ओले काजू
वाटण = २ टेस्पून ताजा नारळ + १/४ कप कोथिंबीर + २ ते ३ टेस्पून पाणी
१ टीस्पून लाल तिखट किंवा चवीनुसार
२ टीस्पून तेल
फोडणीसाठी: २ चिमटी मोहोरी, १/४ टीस्पून हिंग, १/४ टीस्पून हळद
१ टीस्पून चिंचेचा घट्ट कोळ
२ टीस्पून चिरलेला गूळ
चवीपुरते मीठ

कृती:
१) ओले काजू वापरत असाल तर साले काढून टाकावीत. जर ओले काजू नसतील तर वाळवलेले काजू कोमट पाण्यात ८ ते १० तास भिजत घालावेत.
२) कढईत तेल गरम करावे. त्यात मोहोरी, हिंग, हळद घालून फोडणी करावी. त्यात काजू, मीठ आणि लाल तिखट घालून मिक्स करावे. आच मंद ठेवावी. झाकण ठेवून ५ मिनिटे काजू शिजू द्यावेत. कढईत तळाला काजू चिकटू नयेत म्हणून एक-दोनदा ढवळा.
३) ५ मिनिटानी नारळ-कोथिंबीर पेस्ट आणि चिंचेचा कोळ घालावा. २ मिनिटे परतून त्यात काजू बुडतील इतपत पाणी घालावे. झाकण ठेवून काजू शिजू द्यावेत. पाणी जर आटले तर अजून थोडे पाणी घालावे.
४) काजू शिजले कि त्यात गूळ घालून २-३ मिनिटे मंद आचेवर उकळी काढावी.
काजूची उसळ पोळीबरोबर किंवा भाताबरोबर सर्व्ह करावी.

मिरची का सालन - Mirchi Salan

Mirchi ka salan in English

वेळ: ३० ते ४० मिनिटे
वाढणी: ३ जणांसाठी

साहित्य:
३ लांबड्या मिरच्या, एक बाजू सुरीने छेद करावा.
३ टेस्पून खवलेला ताजा नारळ
३ टेस्पून भाजलेल्या शेंगदाण्याचा कुट
१ टेस्पून तीळ
१ मध्यम कांदा, उभे पातळ काप
२ टेस्पून आलेलसूण पेस्ट
२ टीस्पून धनेपूड
१ टीस्पून जिरेपूड
२ टेस्पून चिंचेचा घट्ट कोळ
चिमूटभर मोहोरी, चिमूटभर मेथी दाणे, १/४ टीस्पून हळद
१ डहाळी कढीपत्ता
४ ते ५ टेस्पून तेल
चवीपुरते मीठ

कृती:
१) नारळ, शेंगदाणा कुट आणि तीळ एकत्र करून संपूर्ण कोरडे होईस्तोवर आणि थोडे लालसर होईस्तोवर भाजावे. यात थोडे पाणी घालून एकदम बारीक पेस्ट करावी.
२) २ टेस्पून तेल मध्यम पॅनमध्ये गरम करावे. त्यात मिरच्या घालून परतावे. आच मध्यम ठेवावी. झाकण ठेवून मिरच्या थोड्या मऊ, थोडीशी ब्राउन आणि सुरकुतेल इतपत शिजवावी. मध्येमध्ये बाजू पलटावी म्हणजे मिरच्या जळणार नाहीत.
३) मिरच्या शिजल्या कि पॅनमध्ये काढून ठेवाव्यात. त्याच पॅनमध्ये १ टेस्पून तेल गरम  करून त्यात आलेलसूण पेस्ट परतावी. नंतर कांदा घालावा. कांदा चांगला लालसर आणि खरपूस होईस्तोवर परतावे. (वेळ वाचवण्यासाठी विकतचा तळलेला कांदा वापरावा.) थोडे पाणी घालून मिक्सरमध्ये बारीक वाटावे.
४) त्यात पॅनमध्ये १ टेस्पून तेल गरम करावे. त्यात मेथीदाणे, मोहोरी, हळद आणि कढीपत्ता घालून फोडणी करावी. परतून कांद्याची पेस्ट आणि नारळ-शेंगदाणा-तीळ यांची पेस्ट घालून परतावे. निट मिक्स करून त्यात गरजेपुरते पाणी घालून कान्सीस्टन्सी सारखी करावी.
५) थोडे मीठ, धने-जिरेपूड, चिंचेचा कोळ घालावे. ५ मिनिटे मध्यम आचेवर उकळी काढावी. मिरच्या घालून ५ ते १० मिनिटे उकळी काढावी. चव पाहून काही कमी असल्यास घालावे.
मिरची सालन बिर्याणी बरोबर खातात. तसेच साधा भात किंवा पोळीबरोबरही छान लागते.

स्टफ कॅप्सिकम - Stuffed Simla Mirchi

Stuffed Capsicum in English

वेळ: ४० मिनिटे
वाढणी: २ ते ३ जणांसाठी

साहित्य:
४ लहान भोपळी मिरच्या
१/४ कप मटार
१/४ कप उकडलेले मक्याचे दाणे
१/२ कप पनीरचे लहान चौकोनी तुकडे
१/४ कप कांदा, बारीक चिरून
१/४ कप गाजर, लहान चौकोनी तुकडे
१/२ टीस्पून गरम मसाला
१/२ टीस्पून धनेपूड
१/२ टीस्पून जिरेपूड
१४ टीस्पून लाल तिखट
१/४ कप नारळाचे दुध
चवीपुरते मीठ
२ मध्यम बटाटे, उकडून कुस्करलेले
१ टेस्पून + ३ टेस्पून तेल

कृती:
१) कढईत १ टेस्पून तेल गरम करावे. त्यात कांदा आणि गाजर घालून मिनिटभर परतावे. झाकण ठेवून २-४ मिनिटे शिजवावे. आच मध्यम करून नारळाचे दुध घालावे.
२) मका आणि मटार घालावे. थोडे मीठ घालून मिक्स करावे. भाज्या मऊ होईस्तोवर शिजवावे.
३) गरम मसाला, धने-जिरेपूड, आणि लाल तिखट घालून ढवळावे. जर मिश्रणाला थोडा रस राहिला असेल तर थोडी आच मोठी करून थोडे कोरडे करून घ्यावे.
४) भोपळी मिरचीचा शेंडीकाडचा भाग कापून घ्यावा. आतील बिया काढून टाकाव्यात. तयार मिश्रण मिरच्यांमध्ये भरावे.
५) कुस्करलेल्या बटाट्यांमध्ये थोडे मीठ घालावे. आणि परत कुस्करावे, जर गुठळ्या राहिल्या असतील तर त्यात बारीक कराव्यात. भरलेल्या मिरच्या बटाट्याने सील करून टाकाव्यात.
६) नॉनस्टिक पॅनमध्ये ३ टेस्पून तेल घालावे. त्यात मिरच्या सील केलेली बाजू खाली अशा रीतीने ठेवाव्यात. झाकण ठेवून मध्यम आचेवर साधारण २५ मिनिटे शिजवाव्यात. या २५ मिनिटात मध्येमध्ये मिरच्या हलवून पलटाव्यात. म्हणजे करपणार नाहीत आणि समान शिजतील. (मिरच्यांची साले एकदम मऊ बनतील आणि थोडी सुरकुततील)

कांदा टोमॅटोची ग्रेव्ही किंवा आवडीची तिखट ग्रेव्ही वर घालून भरली भोपळी मिरची पोळी किंवा भाताबरोबर सर्व्ह करावी. भरली भोपळी मिरचीवर माखनी ग्रेव्हीसुद्धा खूप छान लागते.. माखनी ग्रेव्हीची रेसिपी.

टीप:
१) वर दिलेल्या भाज्यांव्यतिरिक्त आवडीच्या कोणत्याही भाज्या घालता येतील.

मसाला वांगी - Masala Vangi

Spicy Eggplant Curry in English

वेळ: ४० मिनिटे
वाढणी: ४ जणांसाठी

साहित्य:
१० लहान वांगी
मसाला पेस्टसाठी:-
१ कप कांदा, पातळ उभा चिरलेला
१ मध्यम टोमॅटो, चिरलेला
५ मोठ्या लसूण पाकळ्या, बारीक चिरून
१ इंच आलं, बारीक चिरून
५ कढीपत्त्याची पाने
१ टेस्पून शेंगदाण्याचा कूट
४ हिरव्या मिरच्या, चिरून
२ टेस्पून खवलेला ताजा नारळ
१/२ टिस्पून खसखस, भाजून पूड केलेली (ऐच्छिक)
१/२ टिस्पून जिरेपूड
१ टिस्पून धणेपूड
१ टिस्पून गरम मसाला
चवीपुरते मिठ
३ टेस्पून तेल
इतर साहित्य:-
२ टिस्पून तेल
५ ते ६ मेथीचे दाणे
१/४ टिस्पून हिंग
१/४ टिस्पून हळद
१/२ टिस्पून काश्मिरी लाल तिखट (लालसर रंग येण्यासाठी)
२ टेस्पून चिंचेचा घट्ट कोळ

कृती:
१) वांग्याचे देठ कापून प्रत्येक वांग्याच्या ६ ते ८ फोडी कराव्यात.
२) मसाला पेस्ट
i) पॅनमध्ये तेल गरम करावे. त्यात कढीपत्ता, कांदा, हिरवी मिरची, लसूण, आणि आलं घालावे. कांदा पारदर्शक होईस्तोवर परतावे.
ii) टोमॅटो घालून ते एकदम मऊसर होईस्तोवर परतावे.
iii) दाण्याचा कूट, नारळ, धणे-जिरेपूड, खसखस, गरम मसाला आणि मिठ घालून मिक्स करावे.
iv) हे मिश्रण गार होवू द्यावे. थोडे पाणी घालून एकदम बारीक वाटून पेस्ट तयार करावी.
३) पॅनमध्ये तेल गरम करावे. मेथी दाणे घालून थोडा रंग बदलेस्तोवर थांबावे. नंतर हिंग, हळद, आणि वांग्याच्या फोडी घालाव्यात. थोडे मिठ घालावे. झाकण ठेवून फोडी थोडावेळ शिजू द्याव्यात. आता वाटलेला मसाला घालावा, चिंचेचा कोळ आणि लाल तिखट घालावे.
गरजेपुरते पाणी घालून कंसिस्टन्सी अड्जस्ट करावी. काही मिनीटे उकळी काढावी.
भात किंवा पोळीबरोबर सर्व्ह करावी.

टीपा
१) जांभळ्या रंगाची लहान वांगी निवडावीत. तसेच साल तुकतूकीत आणि डागविरहीत असावे.
२) काश्मिरी लाल तिखटाला तिखटपणा अगदी कमी असतो पण यामुळे भाजीला रंग सुरेख येतो. वाटल्यास हे तिखट घातले नाही तरी चालेल.
३) या भाजीत थोडा गोडपणा चांगला लागतो. आवडत असल्यास थोडा गूळ किंवा साखर घालावी. (१/२ किंवा १ टिस्पून)

मलाई कोफ्ता - Malai Kofta

Malai Kofta in English

वेळ: साधारण दीड तास
३ जणांसाठी

साहित्य:
कोफ्ता आवरणासाठी:
३ मध्यम बटाटे
२ टेस्पून कॉर्न फ्लोर
चवीपुरते मीठ (१/४ चमचा)
तळणीसाठी तेल
सारणासाठी:
१/२ कप किसलेले पनीर
२ चिमटी मीठ
१/२ टीस्पून साखर
१ हिरवी मिरची, बारीक चिरून
२५ बेदाणे
२ टीस्पून बारीक चिरलेली कोथिंबीर
ग्रेव्हीसाठी:
१ मोठा पांढरा कांदा, मधोमध अर्धा चिरून सोलून घ्यावा
२ टीस्पून बटर
२ हिरव्या मिरच्या
३ मोठ्या लसणीच्या पाकळ्यांची पेस्ट
१/२ टीस्पून आलेपेस्ट
अख्खा गरम मसाला:- २ तमालपत्र, २-३ लवंग, ३ मिरी दाणे, १ लहान दालचीनी, २ वेलची
२ टेस्पून दाटसर काजूपेस्ट
१/२ कप हाफ अँड हाफ (टीप ५)
चवीपुरते मीठ
कृती:
कोफ्ता:
१) बटाटे उकडून घ्यावेत. सोलून व्यवस्थित मॅश करून घ्यावेत. गुठळी अजिबात राहू देवू नये. यामध्ये २ टेस्पून कॉर्न फ्लोर आणि चवीपुरते मीठ घालून माळून घ्यावे. या मिश्रणाचे साधारण ८ समान भाग करावेत.
२) सारणाचे सर्व जिन्नस एकत्र करून मिक्स करावे. याचेही ८ समान भाग करावेत.
३) बटाट्याचे मिश्रण घेउन हातानेच चपटे करून परी तयार करावी (साधारण अडीच ते ३ इंच). मधोमध सारण ठेवून सर्व कडा एकत्र आणाव्यात आणि सीलबंद करावे. अशाप्रकारे सर्व कोफ्ते तळण्यासाठी तयार करावेत. कोफ्त्याचा सरफेस एकदम स्मूथ असावा. भेग पडली असेल तर नीट बंद करावी. कारण तळताना सारण बाहेर येउन कोफ्ता फुटतो.
४) सर्व कोफ्ते मध्यम आचेवर गोल्डन रंगावर तळून घ्यावे. टिपकागदावर काढून ठेवावे.
ग्रेव्ही:
५) कांदा उकडून घ्यावा. (मी प्रेशर कुकरमध्ये २ शिट्ट्या करून कांदा उकडला होता). उकडलेल्या कांद्याची बारीक पेस्ट करावी.
६) पॅनमध्ये बटर गरम करून त्यात अख्खे गरम मसाले घालावेत. नंतर हिरवी मिरची आणि आलेलसूण पेस्ट घालावी. १५ सेकंद परतावे. आता कांद्याची पेस्ट आणि मीठ घालून हाय हिटवर परतावे. जोवर रंग किंचित गुलाबी होईतोवर सतत ढवळावे.
७) काजू पेस्ट घालावी. तळापासून ढवळत राहावे, कारण काजू पेस्ट तळाला चिकटू शकते. किंचित पाणी घालावे. झाकण ठेवून काजूचा कच्चट वास जाईस्तोवर मध्यम आचेवर शिजवावे (३ ते ४ मिनिटे) (टीप)
८) आच एकदम कमी करावी आणि उष्णता थोडी कमी होईस्तोवर थांबावे. आता हाफ अँड हाफ घालून जोरजोरात ढवळावे. कारण कांदा आणि मीठ यामुळे हाफ अँड हाफ फुटण्याची शक्यता असते. एकदा का व्यवस्थित मिक्स झाले कि आच मिडीयम वर ठेवावी आणि काही मिनिटे शिजवावे.
कोफ्त्यावर हि गरमागरम ग्रेव्ही घालून लगेच सर्व्ह करावे.

टीपा:
१) स्टेप ७ मध्ये, काजूपेस्ट व्यवस्थित शिजल्यावर मी अख्खे गरम मसाले काढून टाकले होते. नंतर हि ग्रेव्ही एकदा मिस्करमध्ये बारीक केली ज्यामुळे ती एकदम स्मूथ झाली. हि ग्रेव्ही मी परत पॅनमध्ये घेतली आणि स्टेप ८ फॉलो केली.
२) बटाटे व्यवस्थित मॅश करावेत. गुठळी राहिली तर कोफ्ते गरम तेलात फुटण्याची शक्यता असते.
३) जर गरम मसाला किवा इतर कुठलाही मसाला घातल्यास ग्रेव्हीचा रंग बदलेल. म्हणून अख्खे गरम मसाले वापरले आहेत, ज्यामुळे ग्रेव्हीला मसाल्यांचा हलकासा स्वाद येतो आणि ग्रेव्हीचा रंगही बदलत नाही.
४) सारणामध्ये काजू बदाम पिस्ता यांचे तुकडे घालू शकतो.
५) हाफ अँड हाफ म्हणजे १ भाग क्रीम आणि १ भाग दुध (होल मिल्क) यांचे मिश्रण.

सोया मेथी मटार - Soya Methi matar

Soya Methi Malai in English

वेळ: ४० मिनीटे
वाढणी: ३ जणांसाठी

साहित्य:
दीड कप मेथीची पाने, बारीक चिरून (महत्त्वाची टीप क्र १)
पाउण कप सोया चंक्स
१/२ कप मटार (फ्रोझन)
फोडणीसाठी १ टेस्पून तेल, २ चिमटी जिरे, १/८ टीस्पून हळद, १ टीस्पून आले-मिरचीची पेस्ट, १ टीस्पून लाल तिखट
२ टीस्पून किचन किंग मसाला
१/४ ते १/२ कप हेव्ही क्रीम
चवीपुरते मीठ
सजावटीसाठी २ टेस्पून बारीक चिरलेला टोमेटो

कृती:
१) मेथी धुवून बारीक चिरून घ्यावी. सोया चंक्स गरम पाण्यात ५ मिनिटे भिजवून ठेवावेत. गरम पाणी काढून टाकावे आणि गार पाणी घालावे. २ मिनिटानंतर सोया चंक्स हाताने घट्ट पिळून घ्यावे. हे सोया चंक्स सुरीने थोडे लहान तुकडे होतील इतपत बारीक करावे.
२) कढईत तेल गरम करावे. त्यात जिरे आणि आले-मिरचीची पेस्ट घालून थोडावेळ परतावे. नंतर कांदा, हळद, लाल तिखट, आणि २ चिमटी मीठ घालावे. कांदा लालसर होईस्तोवर परतावे.
३) मटार घालून २ मिनिटे परतावे. नंतर सोया चंक्स आणि मेथीची घालून परतावे. २ मिनिटे झाली कि किचन किंग मसाला घालावा. आता मेथी कोरडी होईस्तोवर झाकण न ठेवता परतावे. चव पाहुन मीठ आणि इतर मसाले लागतील तसे घालावे.
४) मेथी शिजली कि आच एकदम कमी करावी. आणि गरजेनुसार हेव्ही क्रीम घालावे आणि ढवळावे म्हणजे क्रीम फुटणार नाही. आच एकदम कमी असावी.
क्रीम घातल्यावर जास्त उकळवू नये त्यामुळे क्रीम भाजीत फुटण्याचा संभव असतो.
गरमागरम भाजी तोमतो ने सजवून पोळी किंवा रोटी/नान बरोबर सर्व्ह करावी.

टीपः
१) मेथीचा कडवटपणा कमी करायचा असेल तर चिरलेली मेथी मिठाच्या पाण्यात थोडावेळ भिजवून ठेवावी. नंतर पिळून काढावी आणि वापरावी. पण यामध्ये जीवनसत्वांचा नाश होतो. त्यामुळे कडवटपणा अगदीच नको असेल तर हि पद्धत अवलंबावी.
२) सोया चंक्स ऐवजी सोय ग्रानुअल्स वापरले तरीही चालतील.
३) या भाजीत जर मटार घालायचे नसतील तर फक्त सोया चंक्स आणि मेथी अशी सुद्धा भाजी करता येईल.
४) किचन किंग मसाल्या ऐवजी गरम मसाला वापरला तरीही छान चव येते. फक्त थोडा कमी मसाला घालावा.

काश्मिरी दम आलू - Kashmiri Dum Aloo

Kashmiri Dum Aloo in English

वेळ: साधारण १ तास
वाढणी: ३ ते ४ जणांसाठी

साहित्य:
१५ ते १८ लहान बटाटे (टीप)
१/२ कप कांदा, बारीक चिरून
१ कप टोमॅटो, बारीक चिरून
१/२ इंच आल्याचा तुकडा, बारीक चिरून
४ ते ६ मोठ्या लसूण पाकळ्या, बारीक चिरून
२ टेस्पून काजूची पूड
४ टेस्पून दही, फेटून
१/२ टिस्पून सुंठ पावडर, १ टिस्पून बडीशेप पावडर, २ चिमटी लवंग पावडर
१ टिस्पून धणेपूड
१/२ टिस्पून जिरेपूड
१ टिस्पून गरम मसाला
२ टिस्पून काश्मिरी लाल तिखट (टीप)
१ टिस्पून साधं लाल तिखट
१/४ टिस्पून हळद
चवीपुरते मिठ
३ टेस्पून तेल
तळणासाठी तेल
कृती:
१) बटाटे धुवून घ्यावेत. पातेल्यात मिठाचे पाणी उकळवावे. त्यात हे बटाटे सोडून १० मिनीटे झाकण ठेवून किंचीत शिजू द्यावे, जेणेकरून वरचे साल काढता येईल. १० मिनीटांनी पातेल्यातील गरम पाणी काढून गार पाणी सोडावे. आणि बटाट्याचे साल काढून घ्यावे.
२) कढईत तेल गरम करून त्यात बटाटे मिडीयम हाय आचेवर गोल्डन ब्राऊन तळून घ्यावे. खुप भरभर तळून काढू नये. नाहीतर बटाटे बाहेरून ब्राऊन होतात आणि आतून शिजत नाहीत. तळलेले बटाटे टिपकागदावर काढून घ्यावेत. काट्याने किंचीत टोचून घ्यावे, म्हणजे ग्रेव्हीमध्ये घातल्यावर आतपर्यंत ग्रेव्ही मुरेल.
३) कढईत २ चमचे तेल गरम करून त्यात आले लसूण परतावे. कांदा घालून लालसर होईस्तोवर परतावे. साधं लाल तिखट, काजूची पूड आणि टोमॅटो घालावा.मिठ घालून टोमॅटो अगदी नरम होईस्तोवर परतावे. हा मसाला थोडा गार होवू द्यावा. नंतर थोडे पाणी घालून मिक्सरमध्ये एकदम बारीक वाटून घ्यावे.
४) त्याच कढईत १ चमचा तेल घालून हळद आणि काश्मिरी लाल तिखट घालावे. त्यावर कांदा-टोमॅटोची प्युरी घालावी. प्युरी उकळायला लागली कि त्यात सुंठ पावडर, बडीशेप पावडर, लवंग पावडर, धणेपूड, जिरेपूड, गरम मसाला घालून मिक्स करावे.
५) दही घालण्यापूर्वी ५ मिनीटे आच एकदम कमी करावी. नंतर दही घालून भराभर मिक्स करावे म्हणजे दही फुटणार नाही. एग बिटरने मिक्स करावे म्हणजे दही व्यवस्थित मिक्स होईल.
६) दही निट मिक्स झाले कि तळलेले बटाटे घालावेत आणि झाकण ठेवून १५ मिनीटे ग्रेव्ही आटू द्यावी. मधेमधे झाकण काढून ढवळावे म्हणजे ग्रेव्ही तळाला चिकटणार नाही.
गरजेइतका दाटपणा येऊ द्यावा. ग्रेव्ही भातावर किंवा पोळीबरोबर उत्तम लागते.

टीपा:
१) जर लहान बटाटे नसतील बटाट्याचे मोठे तुकडे करून वरीलप्रमाणेच वापरता येतील.
२) काश्मिरी तिखट रंग येण्याकरता घातले आहे. या मिरची पावडरला तिखटपणा नसतो म्हणून नेहमीच्या वापरातील लाल तिखटही घालावे.

व्हेज कोल्हापूरी - Veg Kolhapuri

Veg Kolhapuri in English

वेळ: ४० मिनीटे
वाढणी: ४ जणांसाठी

साहित्य:
१/२ कप गाजराचे चौकोनी तुकडे
३/४ कप बटाटयाचे मोठे तुकडे (बटाटा सोलून)
१/२ कप कॉलीफ्लॉवरचे मध्यम तुरे (फ्रोझन)
१/२ कप हिरवे मटार (फ्रोझन)
१/४ कप फरसबीचे तुकडे (१ इंच)
१/२ कप कांदा, बारीक चिरून
१ कप टोमॅटो, बारीक चिरून
१/२ इंच आल्याचा तुकडा, बारीक चिरून
४ ते ६ मोठ्या लसूण पाकळ्या, बारीक चिरून
१ ते दिड टेस्पून काश्मिरी लाल तिखट (टीप ३ व ५)
२ टिस्पून साधं लाल तिखट
१/४ टिस्पून हळद
६ टेस्पून तेल
२ टेस्पून कोल्हापूरी मसाला
इतर मसाले:
१/४ टिस्पून वेलची पावडर
२ चिमटी लवंग पावडर
१/२ टिस्पून बडीशेप पावडर
१/२ टिस्पून दालचिनी पावडर
१ चिमटी जायफळ पावडर
चवीपुरते मिठ

कृती:
१) कढईत २ टेस्पून तेल गरम करावे. त्यात आलं-लसूण परतून घ्यावे. कांदा घालून लालसर होईस्तोवर परतावे. साधं लाल तिखट आणि टोमॅटो घालावा.मिठ घालून टोमॅटो अगदी नरम होईस्तोवर परतावे. हा मसाला थोडा गार होवू द्यावा. नंतर थोडे पाणी घालून मिक्सरमध्ये एकदम बारीक वाटून घ्यावे.
२) त्याच कढईत ३ टेस्पून तेल, मध्यम आचेवर गरम करावे त्यात हळद आणि १/२ टिस्पून काश्मिरी लाल तिखट घालून लगेच फरसबी आणि बटाट्याचे तुकडे घालावे. मिक्स करून २ ते ३ वाफा काढाव्यात. बटाटे किंचीतच शिजू द्यावे. आच मोठी करून (बटाटे व तिखट करपणार नाही याची काळजी घ्यावी.) कांदा-टोमॅटोची प्युरी घालावी. आच मोठी ठेवल्याने तेल व्यवस्थित तापते आणि फोडणी चांगली बसते. मिश्रण निट ढवळून गरजेपुरते पाणी घालावे.
३) कढईतील मिश्रणाला उकळी येऊ द्यावी. त्यात कोल्हापूरी मसाला, बडीशेप पावडर, लवंग पावडर, दालचिनी पावडर, वेलचीपूड आणि चवीपुरते मिठ घालावे. गाजर, मटार आणि कॉलीफ्लॉवर घालावा. मध्यम आचेवर झाकण ठेवून शिजू द्यावे. १० मिनीटे शिजवावे.
भाजी तयार झाली कि १ ते दिड टिस्पून तेल फोडणीसाठीच्या कढल्यात गरम करावे. १ टेस्पून काश्मिरी लाल तिखट घालावे. आणि लगेचच हि फोडणी भाजीवर ओतावी. (टीप)
ढवळून भाजी सर्व्ह करावी.

टीप:
१) हि भाजी तिखटच असते, पण आपल्या आवडीनुसार तिखटाचे प्रमाण कमीजास्त करावे.
२) काश्मिरी लाल तिखटाला खुप छान लाल रंग असतो पण तिखटपणा नसतो. म्हणून नेहमीच्या वापरातील लाल तिखट हे तिखटपणासाठी आणि काश्मिरी लाल तिखट हे रंगासाठी वापरले आहे.
३) शेवटला जी काश्मिरी लाल तिखटाची फोडणी घालायची आहे ती पूर्णत: ऐच्छिक आहे, या फोडणीमुळे भाजीवर मस्तपैकी लालसर तवंग येतो. तसेच हि फोडणी घालताना तिखट गरम तेलात टाकल्याटाकल्या भाजीवर ओतावी, वेळ लावू नये नाहीतर तिखट करपते.
४) जे मसाले वापरले आहेत ते जरी कमी प्रमाणात आहेत तरी एकत्रितपणे खुप छान हलकासा स्वाद या भाजीला येतो. आवडीनुसार कुठलाही मसाल्याचे प्रमाण किंचीत वाढवले तरी चालते.
५) काश्मिरी लाल तिखटाने स्वाद आणि रंग चांगला येतो. जर अगदीच काश्मिरी लाल तिखट मिळाले नाही तर त्याऐवजी खायचा लाल रंग चिमूटभर वापरू शकतो.

खोया पनीर मटर - Khoya paneer Matar

Khoya matar Paneer in English

वेळ: ३५ ते ४० मिनीटे
वाढणी: २ ते ३ जणांसाठी


साहित्य:
३/४ कप मटार (फ्रोझन)
३/४ कप खवा, भाजलेला
१५० ग्राम पनीर, लहान चौकोनी तुकडे (टीप १)
३/४ कप टोमॅटो प्युरी,
१/२ कप दुध/ पाणी
१ टिस्पून तूप
१ लहान आल्याचा तुकडा, बारीक किसून
१/२ टिस्पून लाल तिखट
१/२ टिस्पून जिरे (ऐच्छिक)
१ टिस्पून धणेपुड
१/२ टिस्पून जिरेपूड
७ ते ८ काजू बी, (थोडे सजावटीसाठी ठेवावे)
१ टेस्पून बेदाणे + अजून थोडे सजावटीसाठी
१ टिस्पून साखर
चवीपुरते मिठ
अख्खा गरम मसाला= १ तमाल पत्र, २ लवंगा, ३ ते ४ मिरीदाणे, २ हिरवी वेलची, १ लहान दालचिनीची काडी किंवा १/२ टिस्पून दालचिनी पावडर

कृती:
१) कढई गरम करून त्यात आख्खे गरम मसाले हलके भाजून घ्यावे. भाजले गेल्यावर लवंगा फुगतात आणि वेलची फुगून फुटते. हे सर्व मसाले कुटून घ्यावे किंवा मिक्सरमध्ये बारीक करावे.
२) कढईत तूप गरम करावे. त्यात काजू, जिरे, आलं आणि टोमॅटो प्युरी घालावी. कढईवर झाकण ठेवून २-३ मिनीटे शिजू द्यावे.
३) भाजलेला खवा आणि १ टीस्पून कुटलेला मसाला घालून मिक्स करावे. जमतील तेवढ्या गुठळ्या फोडाव्यात. तरी, बारीक बारीक गुठळ्या आणि रवाळ टेक्स्चर अपेक्षित आहे. चांगले मिळून येईस्तोवर परतावे (३-४ मिनीटे)
४) आता मटार आणि दुध/ पाणी घालावे. मिक्स करून झाकण ठेवावे व ४-५ मिनीटे शिजू द्यावे.
५) धणे-जिरेपूड, साखर, लाल तिखट, बेदाणे आणि मिठ घालून मिक्स करावे. २-३ मिनीटे उकळी काढावी.
६) शेवटी पनीर घालून १-२ मिनीटे उकळी काढावी.
गरमच सर्व्ह करावी.

टीपा:
१) जेव्हा विकतचे पनीर वापरत असाल तेव्हा पनीरचे लहान चौकोनी तुकडे करावेत. गरम पाण्यात २ मिनीटे बुडवून ठेवावेत. पनीर छान मऊसुत होईल आणि तळायला लागणार नाही.
२) जर टोमॅटोला आंबटपणा नसेल तर थोडीशी आमचूर पावडर घालावी.
३) दुध घातल्यावर ग्रेव्ही व्यवस्थित मिक्स करावी नाहीतर दुध फुटते आणि ग्रेव्ही चोथापाणी होते.
४) जर दालचिनी पावडर वापरणार असाल तर ती इतर मसाल्यांबरोबर भाजू नये, भाजल्यास करपते. म्हणून धणे-जिरेपूड बरोबर दालचिनी पावडर भाजीत घालावी.

मेथी पनीर - Methi Paneer

Methi Paneer in English

वाढणी: २ ते ३ जणांसाठी
वेळ: २५ ते ३० मिनीटे


साहित्य:
१ मोठी जुडी मेथी, पानं खुडून धुवून घ्यावी.
१५० ग्राम पनीर, लहान तुकडे (टीप)
१ लहान कांदा, पातळ उभा कापून
१ मध्यम टोमॅटो, मध्यमसर चौकोनी तुकडे
१/२ इंच आलं
३ ते ४ मोठ्या लसूण पाकळ्या, चिरून
२ ते ४ काळी मिरी
१ टेस्पून दही
१/२ कप क्रिम (टीप)
फोडणीसाठी: १ + १ टेस्पून तेल, चिमूटभर हळद
१ टिस्पून धणे पावडर
चवीपुरते मिठ

कृती:
१) १ टेस्पून तेल पॅनमध्ये गरम करावे. त्यात काळी मिरी, आले, लसूण आणि कांदा घालावा. कांदा लालसर होईस्तोवर परतावे. आता चिरलेला टोमॅटो घालून मऊ होईस्तोवर शिजवावा. गॅस बंद करून हे मिश्रण थंड होवू द्यावे. थंड झाले कि पाणी न घालता प्युरी करून घ्यावी.
२) मेथीची पाने बारीक चिरून घ्यावी. १ टेस्पून तेल पॅनमध्ये गरम करावे. हळद आणि मेथी घालावी बरोबर २-३ चिमटी मिठही घालावे. झाकण न ठेवता मेथी परतावी.
३) मेथीतील पाण्याचा अंश निघून कोरडी झाली कि कांदा-टोमॅटोची प्युरी आणि दही घालावे. निट ढवळून थोडावेळ शिजू द्यावे. धणेपुड आणि गरजेपुरते मिठ घालावे, मिक्स करावे.
४) गॅस अगदी मंद करावा (टीप). पनीर आणि क्रिम घालावे. तसेच लागल्यास थोडे पाणी घालून ढवळावे. खुप पाणी घालू नये कारण मिश्रण जास्त उकळवायचे नाहीये, फक्त खुप घट्ट वाटल्यासच पाणी घालावे.
तयार भाजी पोळी, नान बरोबर सर्व्ह करावी.

टीप्स:
१) रेडीमेड पनीर वापरत असाल तर पनीरचे लहान चौकोनी तुकडे करून गरम पाण्यात २-३ मिनीटे बुडवून ठेवावे. यामुळे पनीर नरम होते.
२) जर क्रिम उपलब्ध नसेल तर, १/२ कप मिल्क पावडर १/४ कप पाण्यात मिक्स करून वापरली तरीही चालेल.
३) गॅसची आच एकदम मंद करूनच क्रिम भाजीत घालावे तसेच एकदा क्रिम घातले कि भाजी जास्तवेळ गरम करू नये. यामुळे क्रिम भाजीत फुटते.

मश्रुम मटर - Mushroom Matar

Mushroom Matar in English

वाढणी: २ ते ३ जणांसाठी
वेळ: ३० ते ३५ मिनीटे

साहित्य:
१२ ते १५ बटण मश्रुम (मध्यम आकाराचे)
१/२ ते ३/४ कप मटार (मी फ्रोजन वापरले होते)
२ टेस्पून बटर
१ टिस्पून लाल तिखट
१/२ कप कांद्याची पेस्ट
३/४ कप टोमॅटो प्युरी
२ टिस्पून आले-लसूण पेस्ट
अख्खा गरम मसाला - २ वेलची, २ लवंगा, १/२ इंच दालचिनी, ४ मिरी दाणे
१/२ टिस्पून गरम मसाला पावडर
२ ते ३ टेस्पून क्रिम
चवीपुरते मिठ

कृती:
१) कढई गरम करावी त्यात वेलची सोडून बाकिचे अख्खा गरम मसाल्याचे जिन्नस घालून कोरडेच भाजावेत. खलबत्त्यात कुटून बारीक पूड करावी. मश्रुमचे उभे पातळ स्लाईस करावे.
२) कढईत बटर गरम करून त्यात कुटलेली मसाला पूड घालावी. वेलची घालावी. नंतर कांद्याची पेस्ट, आले लसूण पेस्ट आणि लाल तिखट घालावे.
३) कांदा छान परतला गेला कि टोमॅटो प्युरी घालावी. एक उकळी काढून त्यात मटार घालून मध्यम आचेवर ३ ते ४ मिनीटे वाफ काढावी. लागल्यास थोडे पाणी घालावे. मिठ आणि गरम मसाला पावडर घालावी.
४) मटार शिजले कि चिरलेले बटन मश्रुम घालावे. एक-दोन मिनीटं मश्रुम शिजू द्यावे. गॅस बंद करावा आणि क्रिम घालून पटपट ढवळावे.
गरम भाजी पोळीबरोबर सर्व्ह करावी.

व्हेजिटेबल कोर्मा - Vegetable Korma

Vegetable Korma in English

वेळ: ३० मिनीटे
वाढणी: ४ जणांसाठी

साहित्य:
दोन कप कॉलीफ्लॉवरचे मध्यम तुरे
१/२ कप मटार
२ मध्यम गाजरं, लहान चौकोनी तुकडे
१/२ कप फरसबीचे तुकडे (२ इंच तुकडे)
१/२ कप पनीरचे चौकोनी तुकडे (ऐच्छिक)
१/२ कप कांदा, बारीक चिरून
१/२ कप टोमॅटो, बारीक चिरून
५ ते ६ काजू
१ टिस्पून गरम मसाला
फोडणीसाठी: २ टेस्पून तेल, ३-४ लवंगा, १/८ टिस्पून मोहोरी, १/४ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट
१ टिस्पून लसूण पेस्ट
१ टिस्पून आले पेस्ट
१ टिस्पून धणेपूड
१/२ कप नारळाचे दूध
१/२ टिस्पून साखर
चवीपुरते मिठ

कृती:
१) कॉलीफ्लॉवरचे तुकडे, मटार, गाजराचे तुकडे, फरसबीचे तुकडे मायक्रोवेव सेफ भांड्यात घ्यावेत. भाज्या बुडतील एवढे पाणी घालावे. १ टिस्पून मिठ घालून मिक्स करावे. मायक्रोवेवमध्ये भाज्या अर्धवट शिजवून घ्याव्यात. (मी भाज्या ५ मिनीटे हाय पॉवरवर शिजवल्या होत्या)
२) कढईत तेल गरम करावे. त्यात लवंग आणि काजू घालून काही सेकंद परतावे. नंतर मोहोरी, जिरे, हिंग, हळद आणि लाल तिखट घालून फोडणी करावी. लसूण पेस्ट परतावी.
३) लसूण पेस्ट परतल्यावर कांदा घालून खमंग परतावा. नंतर टोमॅटो घालावा आणि टोमॅटो एकदम मऊ होईपर्यंत परतावे.
४) नंतर अर्धवट शिजवलेल्या भाज्या घालाव्यात तसेच थोडे (साधारण १/२ कप) पाणी घालावे. गरम मसाला आणि धणेपूड घालावी. झाकण ठेवून भाज्या शिजू द्याव्यात. नंतर नारळाचे दूध, आलेपेस्ट आणि पनीरचे तुकडे घालावे. मध्यम आचेवर २ मिनीटे उकळी काढावी. चवीपुरते मिठ आणि साखर घालावी.
गरमागरम कोर्मा पोळी, पुरी किंवा रोटी बरोबर सर्व्ह करावा.

टीप्स:
१) कोर्मा जर थोडा रस्सेदार केला तर भाताबरोबरही छान लागतो.
२) जर मायक्रोवेव नसेल तर पातेल्यात पाणी उकळवावे. त्यामध्ये भाज्या घालून १ मिनीटभर उकळी काढावी. गॅस बंद करावा आणि पातेल्यावर झाकण ठेवून वाफेवर भाज्या अर्धवटच शिजवाव्यात.
३) कांदा आणि टोमॅटो एकदम बारीक चिरावा.
४) पनीर जर फ्रोजन असेल तर तुकडे करून थोडावेळ गरम पाण्यात घालून ठेवावे. नरम झाले कि पाण्याबाहेर काढावे.
५) आवडीनुसार अजून दुसर्‍या भाज्याही यामध्ये घालू शकतो (उदा. बटाटा)
६) भाज्यांचे प्रमाण आवडीनुसार कमी-जास्त करावे.

Labels:
Vegetable Korma, Korma curry recipe, Indian Curry, Mixed vegetable curry

पनीर मखनी - Paneer Makhani

Paneer Makhani in English

२ ते ३ जणांसाठी
वेळ: ३५ ते ४० मिनीटे

रेस्टोरेंट स्टाईल माखनी ग्रेव्हीसाठी टीप ६ नक्की पहा
साहित्य:
२५० ग्राम पनीर
१/४ कप कांद्याची पेस्ट (टीप ५)
अर्धा ते पाऊण कप टोमॅटो प्युरी (टीप २)
१ टिस्पून आलेलसूण पेस्ट
१ टेस्पून काजूची पेस्ट
अख्खा गरम मसाला - ४ मिरीदाणे, १ तमाल पत्र, १ वेलची, २ लवंगा, १ लहान दालचिनीचा तुकडा
२ चिमटी कसूरी मेथी
१ टिस्पून धणेजिरेपूड
१/२ टिस्पून गरम मसाला
१ टिस्पून लाल तिखट
३ टेस्पून बटर
३ टेस्पून क्रिम किंवा एवेपोरेटेड मिल्क (टीप)
चवीपुरते मिठ

कृती:
१) पनीरचे मध्यम आकाराचे चौकोनी तुकडे किंवा २ इंचाचे लांबडे तुकडे करा. तेलामध्ये डिपफ्राय किंवा शालोफ्राय करून घ्या. (टीप ४)
२) अख्खा गरम मसाल्याचे जे जिन्नस आहेत ते अगदी हलके, कोरडेच भाजून घ्यावे. खलबत्त्यात हे सर्व मसाले एकत्र कुटून घ्यावे.
३) पॅनमध्ये २ टेस्पून बटर गरम करावे. त्यात कुटलेला मसाला घालून काही सेकंद परतावे.
४) त्यात कांद्याची पेस्ट आणि आलेलसूण पेस्ट घालावी. मध्यम आचेवर कांदा शिजेस्तोवर परतावे. (साधारण ४ ते ५ मिनीटे)
५) कांदा शिजला आणि थोडा रंग बदलला कि टोमॅटो प्युरी घालून मध्यम आचेवर काही मिनीटे शिजवावे.
६) टोमॅटो प्युरी शिजल्यावर त्यात कसूरी मेथी, धणेजिरेपूड, गरम मसाला पावडर, लाल तिखट आणि चवीपुरते मिठ घालून मिक्स करावे.
७) आच एकदम मंद करावी. काजू पेस्ट आणि क्रिम घालून जोरजोरात ढवळावे म्हणजे क्रिम फुटणार नाही. थोडे बटर घाला.
एकदा क्रिम निट मिक्स झाले कि तळलेले पनीर घालावे. साधारण ३० सेकंद मंद आचेवर गरम करावे. सर्व्हिंग प्लेटमध्ये भाजी वाढून त्यावर थोडे क्रिम घालून सजवावे.
पोळी किंवा नान बरोबर सर्व्ह करावे.

टीपा:
१) व्यवस्थित पिकलेले आणि लालबुंद टोमॅटो वापरावेत.
२) टोमॅटो प्युरी बनवण्यासाठी, टोमॅटो काचेच्या भांड्यात ठेवावे (साधारण ३-४ मध्यम). टोमॅटो बुडेस्तोवर पाणी घालावे आणि मायक्रोवेव्हमध्ये ४ ते ५ मिनीटे शिजवावे. नंतर टोमॅटो मिक्सरमध्ये एकदम बारीक वाटावे आणि तयार प्युरी चाळणीतून गाळून घ्यावी.
३) जर क्रिम किंवा एवेपोरेटेड मिल्क नसेल तर १/२ ते ३/४ कप मिल्क पावडर घ्यावी त्यात साधारण १/४ कप पाणी घालून दाटसर मिश्रण बनवावे. हे मिश्रण क्रिमऐवजी वापरले तरीही चालते.
४) जर पनीर तळायचे नसेल तर गरम पाण्यात पनीरचे तुकडे काही मिनीटे बुडवून ठेवावे. पनीर छान मऊसर होते.
५) कांद्याच्या पेस्टऐवजी कांदा पातळ उभा चिरून घ्यावा व तेलात चांगला खरपूस तळून घ्यावा. हा तळलेला कांदा मिक्सरमध्ये बारीक वाटून मग वरीलप्रमाणेच कृती फॉलो करा.
६) पनीर माखनी वेगळ्या ग्रेव्हीमध्ये ट्राय करून पहा - कृतीसाठी इथे क्लिक करा.

Labels:
Paneer makhanwala, paneer makhani, butter paneer, paneer butter masala.