चुरमा लाडू - Churma Laddu

Besan Churma Laddu in English

वेळ: ३० मिनिटे
६ मध्यम लाडू

साहित्य:
३/४ कप बेसन
१/२ कप साखर
१/४ कप पाणी
१/४ किलो तूप
१/२ टीस्पून वेलचीपूड
१ टेस्पून बेदाणे

कृती:
१) बेसन एका वाडग्यात घालावे. २ टीस्पून कडकडीत गरम तुपाचे मोहन बेसनात घालावे. मिक्स करून ३-४ टेस्पून पाणी घालून घट्ट मळून घ्यावे. १५ मिनिटे झाकून ठेवावे.
२) १५ मिनिटांनी परत एकदा मळून घ्यावे. खूप घट्ट वाटल्यास थोडे पाणी घालून मळावे. (पुरी लाटता येईल इतपतच मऊ करावे)
३) कढईत तूप गरम करावे. मळलेल्या बेसनाच्या पातळसर पुऱ्या लाटाव्यात. या पुऱ्या गरम तुपात तळून घ्याव्यात. आच मध्यम आणि मंद यांच्यामध्ये ठेवावी.
४) पुऱ्या तळल्यावर खुसखुशीत झाल्या पाहिजेत. पुऱ्या कोमट झाल्या कि हाताने चुरून घ्याव्यात. चाळणीवर चाळून चाळणीत उरलेला जाडसर भाग लाटण्याने लाटून बारीक करावे किंवा खलबत्त्यात कुटून घ्यावे. (शॉर्टकट - मी पुऱ्या गार झाल्यावर मिक्सरमध्ये बारीक पूड केली)
५) साखर आणि पाणी एकत्र करून दोन तारी पाक करावा. साखर विरघळून उकळी फुटली कि ३-४ मिनिटांनी पाकाचा एक थेंब प्लेटमध्ये टाकावा. दोन चिमटीत घेउन उघडझाप करावी. दोन तारा दिसल्या तर पाक तयार झाला असे समजावे नहितर अजून थोडावेळ उकळावे. फक्त मध्येमध्ये तार चेक करत राहावी. गरम दोनतारी पाक कुटलेल्या बेसनात घालावा. वेलचीपूड आणि बेदाणे घालावे. मिक्स करून मिश्रण आळू द्यावे.
६) मिश्रण आळले कि लाडू वळावेत.

टीपा:
१) लाडूचे मिश्रण आळायला लागणारा वेळ बऱ्याच गोष्टींवर अवलंबून आहे. पाक जर दोन तारीपेक्षा थोडा जास्त झाला तर लाडूचे मिश्रण लवकर आळेल. पाक जर दोनतारी पेक्षा कमी आटला असेल वेळ जास्त लागेल. तसेच थंड प्रदेशात मिश्रण पटकन आळते. आणि याउलट उष्ण भागात आळायला वेळ जास्त लागतो.
२) पुऱ्या खूप डार्क रंग येईपर्यंत तळू नयेत. गडद रंग आल्यास लाडूसुद्धा काळपट रंगाचे होतील.
३) या लाडवांची चव थोडी बुंदी लाडूसारखी लागते.
४) वरील पाककृतीत बेसनाऐवजी गव्हाचे पीठ आणि थोडा रवा वापरूनसुद्धा चुरमा लाडू बनवता येतात. गव्हाची कणिक (७०%)  आणि रवा (३०%).
५) ६ कप बेसन आणि ४ कप साखर वापरून केलेला पाक यापासून साधारण ४५ ते ५० लाडू होतील.

साबुदाणा पीठाचे लाडू - Sabudana Flour Ladu

Sabudana Ladu in English

वेळ: ३० मिनिटे
१५ मध्यम लाडू

साहित्य:
१ कप साबुदाणा पीठ
३/४ कप साजूक तूप, वितळलेले
१/२ कप पिठी साखर
१/२ कप खारीक पूड (भरडसर)
१/२ कप सुके खोबरे, किसून भाजलेले
१/२ टीस्पून वेलची पूड

कृती:
१) कढईत तूप गरम करून त्यात साबुदाणा पीठ मंद आचेवर भाजून घ्यावे. पिठाचा रंग किंचित बदलेस्तोवर भाजावे, साधारण १० मिनिटे. भाजताना  तळापासून ढवळावे.
२) साबुदाणा पीठ भाजले कि आच बंद करावी आणि कढई बाजूला करावी. यात खारीक पूड, साखर, भाजलेले खोबरे आणि वेलची पूड घालून मिक्स करावे.
३) मिश्रण हाताळण्याइतपत कोमट झाले कि लगेच लाडू वळावेत.

टीपा:
१) लाडू नाजूक असतात त्यामुळे वळताना काळजी घ्यावी. लागल्यास थोडे कोमट केलेले तूप वरून घालावे.
२) खारीक पावडर ऐच्छिक आहे. पण त्यामुळे चव आणि टेक्स्चर चांगले येते. लाडूचा चिकटा बसत नाही.

अळिव लाडू - Alivache Ladu

Aliv Ladu in English

वेळ: १५-२० मिनिटे
साधारण १८-२० मध्यम लाडू

साहित्य:
४ कप नारळाचा चव
दिड कप गूळ
१/२ कप अळिव
१५ बदाम, सोलून पातळ काप
३ ते ४ टेस्पून चारोळी
३ ते ४ टेस्पून बेदाणे
१/२ टिस्पून जायफळ पूड

कृती:
१) अळीव नारळाच्या पाण्यात किमान २ ते अडीच तास भिजत ठेवावे.
२) कढई गरम करून त्यात भिजवलेले अळिव, खवलेला नारळ, आणि गूळ घालून मिक्स करावे. मध्यम आचेवर मिश्रण घट्ट होईस्तोवर ढवळावे.
३) मिश्रण घट्टसर झाले कि त्यात बदाम, चारोळी, बेदाणे आणि जायफळ पूड घालून मिक्स करावे. मिश्रण गरमसर असतानाच लाडू वळावेत.

टीप:
१) जायफळऐवजी वेलची पूडही वापरू शकतो.
२) जर नारळाचे पाणी नसेल तर साध्या पाण्यात अळीव भिजवले तरी चालतील.

Related Recipes
Aliv Kheer

खजुराचे लाडू - Khajurache Ladoo

Dates Laddu in English

वेळ: १५ मिनिटे
१० ते १२ लहान लाडू

साहित्य:
२५ खजूर, बिया काढून (मिक्सरमध्ये भरडसर वाटून १ कप)
१/२ कप बदाम, भरडसर वाटून
१/२ कप किसलेले सुके खोबरे, गुलाबीसर भाजून
१ टेस्पून तूप
१ टीस्पून खसखस

कृती:
१) खजुराच्या बिया काढून खजूर मिक्सरमध्ये भरडसर वाटून घ्यावे. नॉनस्टिक पॅनमध्ये तूप गरम करावे त्यात खसखस घालून काही सेकंद परतावे. त्यात भरडसर वाटलेले बदाम, खोबरे आणि खजूर घालून मंद आचेवर गरम करावे.
२) नीट मिक्स झाले कि थाळीमध्ये काढून ठेवावे. हाताच्या तळव्यांना थोडे तूप लावून मिश्रण कोमटसर असतानाच लाडू बांधावेत.
शक्यतो एक ते दोन घासात संपेल इतपतच लाडूचा आकार असावा. खजूर उष्ण असतात एक लाडू आणि त्यावर ग्लासभर दुध प्यायल्यास शरीराला भरपूर उष्मांक मिळतात.

टीपा:
१) साध्या खजूराप्रमाणेच काळ्या खजूराचेही अशाप्रकारे लाडू करू शकतो.
२) मी फक्त बदामच वापरले होते. आवडीनुसार पिस्ता किंवा काजू असे सर्व मिळून अर्धा कप वापरू शकतो. जर जास्त ड्राय फ्रुट्स वापरायची असतील तर खजूराचे प्रमाणही वाढवावे. नाहीतर लाडू नीट बांधले जात नाहीत.
३) तुपाचे प्रमाण आवश्यकतेनुसार वाढवावे.
४) मी बदामाच्या रेडीमेड काप मिळतात ते वापरले होते. ते शक्यतो वापरू नयेत कारण लाडू बांधायला थोडे त्रासदायक पडते.
५) खजूराला ओलसरपणा असावा. कोरडे खडखडीत खजूर लाडवांसाठी चांगले लागत नाहीत.

रवा नारळाचे लाडू - Rava naralache ladu

Rava Coconut laddu in English

२२ ते २४ मध्यम लाडू
वेळ: ३० मिनीटे (मिश्रण आळायला लागणारा वेळ न धरता)

साहित्य:
२ कप बारीक रवा
१ कप खवलेला ताजा नारळ
दिड कप साखर
१ कप पाणी
३ ते ४ टेस्पून तूप
१/२ टिस्पून वेलची पूड
२५ बेदाणे

कृती:
१) रवा मध्यम आचेवर ४ मिनीटे कोरडाच भाजावा. तळापासून सारखे ढवळत राहावे जेणेकरून रवा जळणार नाही. [रंग बदलेस्तोवर भाजू नये, अगदी हलकेच भाजावे. नंतर परत रवा भाजायचा आहे.]
२) भाजलेला रवा परातीत काढावा. त्यात खवलेला नारळ घालावा आणि मिसळावे. नारळातील ओलसरपणा रव्यात उतरेस्तोवर (१० मिनीटे) तसेच ठेवावे.
३) कढई गरम करून त्यात तूप घालावे. तूप वितळले कि रवा-नारळाचे मिश्रण घालावे. ८ ते १० मिनीटे मिश्रण मिडीयम-हाय फ्लेमवर भाजावे. सतत तळापासून ढवळावे. काही वेळाने रवा आणि तूपाचा छान वास येईल. रव्याचा रंग हलका बदामी होईस्तोवर भाजावे. भाजलेले मिश्रण परातीत काढून ठेवावे.
४) साखर आणि पाणी एकत्र करून एकतारी पाक करावा. मिश्रण उकळायला लागले कि साधारण ३ ते ४ मिनीटांनी पाकाचा थेंब पहिले बोट आणि अंगठा यात पकडून उघडझाप करावी. जर एक तार दिसली कि पाक तयार आहे असे समजावे [हि तार अगदी सेकंदभरच दिसेल]. किंवा एकतारी पाक ओळखता येत नसेल. मिश्रण उकळायला लागले कि ३ ते ४ मिनीटात एकतारी पाक तयार होतो. पाक तयार झाला कि गॅस बंद करावा.
५) लगेच पाक रवा-नारळाच्या मिश्रणात ओतावा. मिक्स करावे. मिश्रण सुरूवातीला पातळ दिसेल पण काहीवेळाने घट्ट होईल. यात वेलचीपूड घालावी. मिश्रण आळेस्तोवर मधेमधे मिक्स करत राहावे.
मिश्रण आळले कि लाडू बनवावेत. प्रत्येक लाडवावर एकेक बेदाणा लावावा.

टीपा:
१) हे लाडू फार काळ टिकत नाहीत, जास्तीत जास्त ७-८ दिवस टिकतील. उष्ण आणि दमट हवामानात ३-४ दिवसच टिकतील. अशावेळी २-३ दिवसांनी लाडू फ्रिजमध्ये ठेवावे.
२) रवा साधारण ३ प्रकारचा मिळतो. जाड (coarse), बारीक (fine), एकदम बारीक (super fine). वरील रेसिपीसाठी बारीक रवा वापरावा. जाड रव्यामुळे लाडू चरचरीत लागतात. एकदम बारीक रवा पिठासारखाच दिसतो त्यामुळे रवा लाडूसाठी योग्य नसतो.
३) लाडूचे मिश्रण जर कोरडे झाले तर एकतारी पाक जरा जास्त आटल्याने दोन तारी किंवा तीन तारी झाला असावा. अशावेळी १/२ कप पाणी + ३ टेस्पून साखर असे मिश्रण उकळवावे. ३ ते ४ मिनीटे उकळवून पाक लाडू मिश्रणावर ओतावा. मिक्स करून मिश्रण आळले कि लाडू करावे.
४) आवडीनुसार सुका मेव्याचे तुकडे घालावे.
५) नारळाचा फक्त पांढरा भाग घ्यावा. करवंटीकडील काळपट भाग घेऊ नये.

मेथीचे लाडू - Methi Ladu

Methi Ladu in English

२५ मध्यम लाडू
वेळ: दिड ते २ तास

साहित्य:
१ कप गव्हाचे पिठ
२ कप सोयाबिन पिठ
१ कप काजू पावडर
१ कप खारीक पावडर
१/२ कप बदाम पावडर
१/२ कप पिस्ता पावडर
२ कप सुकं खोबरं, किसून भाजलेले
५० ग्राम डिंक पावडर
५० ग्राम मेथी
दोन ते अडीच कप गूळ, किसलेला
अंदाजे १/२ किलो तूप

मेथीचे लाडू पाककृती २ - साखर घातलेले मेथीचे लाडू

कृती:
१) कढई चांगली तापवावी. नंतर गॅस बंद करावा व तेवढ्याच उष्णतेवर मेथी भाजून घ्यावी. या मेथीची पूड करावी.
२) साधारण दिड ते दोन कप गरम तूप घ्यावे. यामध्ये मेथी पावडर आणि डिंक पावडर १५ मिनीटे फेसावे. असे १ दिवसाआड ८ दिवस फेसावे. फेसल्याने मेथीचा कडूपणा कमी होतो.
३) काजू, पिस्ता, बदाम, खारीक पावडर प्रत्येकी १ टेस्पून तूपावर भाजावे.
४) गव्हाचे पिठ आणि सोयाबिनचे पिठ थोड्या तूपावर भाजून घ्यावे. (महत्त्वाची टिप पहा)
५) वरील सर्व जिन्नस एकत्र करावे. (काजू-पिस्ता-बदाम-खारीक यांची पावडर, भाजलेले खोबरे, फेसलेले डिंक आणि मेथी, भाजलेले गहू-सोयाबिन पिठ)
६) गूळ पातेल्यात घ्यावा त्यात २ ते ३ चमचे पाणी घालावे. गूळ वितळेस्तोवर कढईत गरम करावा. गूळ वितळला कि गॅस बंद करावा. त्यात वरील एकत्र केलेले जिन्नस मिक्स करावे आणि लाडू वळावे.

टीप:
१) जर शक्य असेल तर अख्खे गहू आणि सोयाबिन तूपावर भाजून त्याचे पिठ करावे.
२) लाडू वळताना मिश्रण थोडे अजून ओलसट हवे असेल तर तयार मिश्रणात गरजेपुरते पातळ गरम तूप घालावे. मिक्स करून लाडू वळावेत.

डिंकाचे लाडू - Dinkache Ladu

Dinkache Ladu in English

वेळ: साधारण दिड तास
नग: साधारण २५ ते २८ मध्यम लाडू

साहित्य:
२०० ग्राम डिंक
तूप - साधारण १/२ किलोला थोडे कमी
१ कप मूगाचे पिठ
१ कप सोयाबिन पिठ
३/४ कप भरडसर वाटलेले बदाम
३/४ कप भरडसर वाटलेले काजू
३/४ कप भरडसर वाटलेले पिस्ता
१ कप खारीक पावडर
१/४ कप बेदाणे
१ कप सुके खोबरे
एका जायफळाची पावडर
३/४ किलो मऊ गूळ

कृती:
१) २०० ग्राम डिंक १/४ किलो तूपात तळावा. डिंक तळून उरलेल्या तूपात मूगाचे व सोयाबिनचे पिठ भाजून घ्यावे.
२) भरडसर वाटलेले बदाम, काजू पिस्ता आणि खारीक, प्रत्येकी एकेक चमचा तूपावर मंद आचेवर भाजून घेणे.
३) सुकं खोबरं कोरडंच भाजावं. जायफळ बारीक किसणीवर किसून घ्यावे.
४) तळलेला डिंक, भाजलेले सोयाबिन-मूगाचे पिठ, भाजलेला सुका मेवा, बेदाणे, भाजलेले खोबरे आणि जायफळ पूड एकत्र करून घ्यावे.
५) कूकरच्या तळाला १ भांडं पाणी घालावे. गूळ किसून कूकरच्या आतल्या डब्यात पाणी न घालता ठेवावा आणि डबा उघडाच ठेवावा. कूकर बंद करून २ शिट्ट्या होवू द्यावा. वाफ जिरली कि गरम गूळ एका परातीत घालावा. त्यामध्ये एकत्र केलेले जिन्नस (स्टेप क्रमांक ४) घालावे. सर्व एकत्र मिक्स करून लाडू वळावेत.

टीप:
१) गूळ कूकरमध्ये शिजवला कि त्याचा पाक करावा लागत नाही. जर कूकरमध्ये गूळ शिजवणे जमणार नसेल तर जाड बुडाच्या कढईत किसलेला गूळ आणि २ ते ३ टेस्पून पाणी घालून गूळ पूर्ण वितळू द्यावा. या पाकात जिन्नस घालावे आणि लाडू वळावे.
२) गूळ कूकरमध्ये शिजवला कि ५ मिनीटात कूकर उघडून गरम गूळच वापरावा.

कणकेचे लाडू - Kanakeche Ladu

Wheat Flour Laddu in English

५ ते ८ मध्यम लाडू
वेळ: २० मिनीटे

साहित्य:
१ कप कणिक
१/२ कप तूप
१/२ ते ३/४ कप किसलेला गूळ
१/२ टिस्पून वेलचीपूड

कृती:
१) तुपावर कणीक मध्यम आचेवर खमंग भाजावी.
२) कणकेचा रंग किंचीत बदलला कि गॅस मंद करून गूळ आणि वेलचीपूड घालावा. आणि निट मिक्स करावे.
३) मिश्रण गरम असतानाच लाडू वळावेत.

टीप:
१) हे लाडू अजून पौष्टिक करण्यासाठी गूळाबरोबर १ चमचा खारीकपूड, १ चमचा बदामपूड १ चमचा भाजलेले सुके खोबरे घालावे आणि मग लाडू वळावेत. हे जिन्नस घातल्यास थोडे तुपाचे प्रमाण वाढवावे.