बटाटा फ्रॅंकी - Bombay Potato Frankie

Potato Frankie in English

वेळ: ४० मिनिटे
६ मध्यम फ्रॅंकीज

साहित्य:
१ कप उकडून कुस्करलेले बटाटे
१/२ कप ब्रेड क्रम्स
१ टेस्पून हिरवी मिरची, ठेचलेली
१/२ टीस्पून चाट मसाला
१/२ टीस्पून गरम मसाला
चवीपुरते मीठ
फ्रॅंकी रॅपसाठी
३/४ ते १ कप मैदा
१ टेस्पून तेल
चवीपुरते मीठ
पुरेसे पाणी पीठ मळण्यासाठी
इतर साहित्य:
१/२ कप बारीक चिरलेला कांदा
२ टेस्पून व्हिनेगर
१ टीस्पून बारीक चिरलेली मिरची
२ ते ३ चिमटी मीठ
चाट मसाला चवीनुसार

कृती:

१) एका भांड्यात मैदा, तेल आणि मीठ घालून मिक्स करावे. पाणी घालून मध्यम असा गोळा भिजवावा. झाकण ठेवून १५ ते २० मिनिटे भिजू द्यावा.
२) एका वाडग्यात कुस्करलेले बटाटे, हिरवी मिरची, ब्रेड क्रम्स, चाट मसाला, गरम मसाला आणि मीठ घालावे. छान मळून त्याचे ६ सारखे भाग करावे. प्रत्येक भागाला कॅप्सुलसारखा लंबाकृती आकार द्यावा. सर्व साहित्य शिजलेले असल्याने रोल्सन शालो फ्राय करू शकतो. आवडत असल्यास डीप फ्रायसुद्धा करू शकतो. शालो फ्राय करणार असाल तर थोड्याथोड्या वेळाने रोल टर्न करावा म्हणजे सर्व बाजूंनी शेकला जाईल.
३) पिठाचा गोळा ६ भागात विभागून घ्यावा. एक गोळा घेउन पातळसर पोळी लाटावी. गरम तव्यावर थोडे तेल लावून शेकून घ्यावी, दुसरी बाजू शेकताना आच मंद ठेवावी.
४) रोल्स मायक्रोवेव्हमध्ये थोडे गरम करावे. गरम पोळी घेउन त्यावर गरम केलेला रोल ठेवावा. चाट मसाला भुरभुरावा, थोडी हिरवी मिरची, किंचित मीठ, कांदा आणि १/२ टीस्पून व्हिनेगर बटाट्याचा रोलवर घालावे. दोन्ही बाजू रोलवर आणून गुंडाळावे. गरमच सर्व्ह करावे.
अशाप्रकारे उरलेल्या फ्रॅंकीज  बनवाव्यात.

टीप:
फ्रॅंकीसाठीची पोळी हि मैद्याचीच असावी. कणिक किंवा इतर पीठांपासून तयार केलेले रॅप्समुळे चवीत आणि टेक्स्चरमध्ये खूप फरक पडतो.

मिश्र कडधान्याची धिरडी - Mixed Kadadhanya Dhirade

Mixed Kadadhanya Dhirade in English

वेळ: ४ मिनिटे प्रत्येकी एका धिरड्याला
१५ मध्यम आकाराची धिरडी

साहित्य:
१ कप वरपर्यंत भरून मिश्र कडधान्य (मी मुग, मटकी, कबुली चणे, मसूर, उडीद, चवळी आणि हिरवे वाटाणे वापरले होते.)
३ ते ४ हिरव्या मिरच्या किंवा चवीनुसार
१ टीस्पून जिरे
१/४ कप तेल
१/४ कप कोथिंबीर, बारीक चिरून
चवीपुरते मीठ
इतर ऐच्छिक साहित्यासाठी टीप २ पहा.

कृती:
१) सर्व कडधान्ये एकत्र करून पाण्यात ८ ते १० तास भिजवावीत. पाण्याची पातळी साधारण ३ ते ४ इंच वर असावी.
२) कडधान्ये नीट भिजली कि त्यातील न भिजलेली, कडक राहिलेली कडधान्ये वेचून काढून टाकावीत.
३) स्वच्छ केलेली कडधान्ये कापडात बांधून मोड यायला उबदार जागी ठेवावी. ७ ते १० तासांनी मोड येतील.
४) मोड आले कि मिक्सरमध्ये कडधान्ये, मिरच्या, मीठ आणि गरजेनुसार पाणी घालून किंचित भरडसर राहील असे फिरवावे. इडली पीठाएवढे घट्ट असावे.
५) चिरलेली कोथिंबीर, जिरे आणि मीठ (लागल्यास) घालावे.
६) नॉन-स्टीक तवा गरम करून त्यावर थोडेसे तेल घालावे. डावभर पीठ घालून ते जमेल तेवढे पातळ पसरवावे. आच मध्यम ठेवावी. झाकण ठेवून २-३ मिनिटे वाफ काढावी. नंतर झाकण काढून धीरड्याच्या कडेने तेल सोडावे. बाजू पालटून दुसरी बाजूही नीट शिजू द्यावी.
७) टोमॅटो केचप किंवा आवडीचे तोंडीलावणे घेउन गरमच खावे.

टिप्स:
१) मी १/४ कप मुग, १/४ कप मटकी, १/४ कप काबुली चणे, २ ते ३ टेस्पून उडीद (किंवा उडीद डाळ), १/४ कप मसूर, ३ टेस्पून चवळी, ३ टेस्पून हिरवे वाटाणे घेतले होते. तुम्हाला आवडीनुसार आणि घरात अव्हेलेबल असलेले कोणतेही कडधान्य वापरू शकता. फक्त वाल किंवा तत्सम उग्र वास असणारे कडधान्य वापरू नये.
२) यामध्ये ठेचलेली लसूण आणि चिरलेला कांदाही घालू शकतो. तसेच कोथिंबीरीऐवजी पालकाची पाने बारीक चिरून घालू शकतो.

राजमा पुलाव - Rajma Rice

Rajma Rice in English

वेळ: ३५ ते ४० मिनिटे
वाढणी: ३ जणांसाठी

साहित्य:
१/२ कप राजमा
१ कप बासमती तांदूळ
२ तमाल पत्र, २ लवंगा, २ वेलची
दीड टीस्पून गरम मसाला
२ मध्यम टोमॅटो, बारीक चिरून
१/२ कप कांदा, बारीक चिरून
१ टीस्पून आले पेस्ट
१ टीस्पून लसूण पेस्ट
२ टेस्पून तूप
१/२ टीस्पून हळद, १/२ टीस्पून लाल तिखट, १/२ टीस्पून काश्मिरी लाल तिखट
चवीपुरते मीठ
१/४ कप कोथिंबीर, बारीक चीरून

कृती:
१) राजमा ७ ते ८ तास पाण्यात भिजत घालावा. प्रेशर कुकरमध्ये राजमा २ ते ३ शिट्ट्या करून शिजवून घ्यावा. शिजवताना थोडे मीठ घालावे. राजमा अख्खा राहिला पाहिजे पण शिजलाही पाहिजे.
२) तांदूळ पाण्यात १० मिनिटे भिजवावा. त्यातील पाणी निथळून टाकावे. तेल गरम करून त्यात तमाल पत्र, लवंगा, आणि वेलची परतून घ्यावी. निथळलेला तांदूळ घालून कोरडा होईस्तोवर परतावा. तांदूळ परतताना दुसऱ्या स्टोव्हवर २ कप पाणी गरम करावे.
३) तांदूळ चांगला भाजला गेला कि त्यात गरम पाणी घालावे. तांदुळाच्या वरती पाणी दिसायचे कमी झाले कि आच लगेच मंद करावी आणि झाकण ठेवून वाफेवर भात शिजवावा. मध्ये फक्त एकदा किंवा दोनदा हलकेच तळापासून ढवळावे. भात शिजला कि राजमा करी बनवेस्तोवर बाजूला काढून ठेवावा.
४) कढईत १ टेस्पून तूप गरम करावे त्यात हळद, लाल तिखट आणि आलेलसूण पेस्ट घालून परतावे. कांदा घालून पारदर्शक होईस्तोवर परतावा. टोमॅटो आणि मीठ घालून पूर्ण मऊ होईस्तोवर परतावे.
५) शिजवलेला राजमा आणि लागल्यास १/४ कप पाणी घालावे. थोडावेळ उकळी काढून गरम मसाला घालावा. ग्रेव्ही घट्टसर झाली पाहिजे कारण नंतर ती भातात घालायची आहे.
६) ग्रेव्ही घट्ट झाली कि त्यात भात घालून मिक्स करावे (टीप). झाकण ठेवून मंद आचेवर वाफेवर भात शिजवावा, साधारण ५ ते ८ मिनिटे. यामुळे ग्रेव्हीचा स्वाद भातात चांगला मुरेल.
कोथिंबीरिने भात सजवून रायत्याबरोबर सर्व्ह करावा.

टीप:
१) कधीकधी टोमॅटो आतून पोकळ असला कि ग्रेव्ही कमी बनते. त्यामुळे भाताचे आणि ग्रेव्हीचे प्रमाण चुकू शकते. अशावेळी भात बेताबेतानेच घालावा आणि ग्रेव्हीमध्ये मावेल इतकाच भात घालावा.

ओट्स ब्राउन राईस इडली - Oats Idli

Oats and brown rice idli in English

२२ ते २५ मध्यम इडल्या

साहित्य:
१/२ कप उडीद डाळ
१ कप ब्राउन राईस
१ कप रोल्ड ओट्स
चवीपुरते मीठ

कृती:
१) उडीद डाळ आणि ब्राउन राईस पाण्यात साधारण ६ ते ७ तास भिजत घालावे.
२) ६-७ तासानंतर पाणी निथळून टाकावे. आणि दोन्ही वेगवेगळे मिक्सरमध्ये बारीक वाटून घ्यावे. वाटताना थोडे पाणी घालावे.
३) रोल्ड ओट्स १० मिनिटे अर्धा ते पाउण कप पाण्यात भिजत घालावे. १० मिनीटांनी बारीक पेस्ट करून घ्यावे.
४) मोठे खोलगट स्टीलचे किंवा काचेचे भांडे घ्यावे. त्यात वाटलेला तांदूळ, वाटलेली डाळ आणि वाटलेले ओट्स घालावे. एक टीस्पून मीठ घालावे.
५) वाटलेले मिश्रण झाकून उबदार जागी आंबण्यासाठी ठेवावे. साधारण ८ ते १० तासात पीठ आंबेल (महत्त्वाची टीप १)
६) मिश्रण आंबले कि किंचीतशी चव पाहून मिठाचा अंदाज घ्यावा. लागल्यास मीठ घालावे. मिक्स करावे. पीठ जर खूप दाट वाटत असेल तर थोडेथोडे पाणी घालून सारखे करावे.
७) इडली पात्राला तेल लावून घ्यावे. त्यात इडलीचे पीठ घालून स्टॅंड तयार करावा. इडली कुकर घेउन त्यात तळाला २ इंच भरेल इतपत पाणी घालावे. साधा कुकर वापरणार असाल तर झाकानावरील शिट्टी काढून ठेवावी.
८) पाणी उकळायला लागले कि इडली स्टॅंड आत ठेवावा. झाकण लावून १२ ते १५ मिनिटे मोठ्या आचेवर वाफ काढावी. गॅस बंद करावा आणि ५ ते ७ मिनिटानी इडली स्टॅंड बाहेर काढावा. चमच्याने किंवा सुरीने इडल्या सोडवून घ्याव्यात.
अशाप्रकारे उरलेल्या पिठाच्या इडल्या बनवून घ्याव्यात.
गरम इडल्या सांबर आणि नारळाच्या चटणी बरोबर सर्व्ह कराव्यात.

टीपा:
१) थंड वातावरणात पीठ सहज आंबत नाही. जर ओव्हन असल्यास २०० F वर चालू करून लगेच २-४ मिनिटांनी स्विच ऑफ करावा. पीठाचे भांडे झाकून ओव्हनमध्ये ठेवावे. ओव्हनमधील तापमानामुळे पीठ आंबायला मदत होईल.
२) इडल्या आधी करून ठेवल्या तरी चालतात. मायक्रोवेव्हमध्ये गरम करून सर्व्ह कराव्यात.
३) मी तांदूळ न वापरता पूर्ण ओट्स वापरून इडल्या करून पहिल्या आहेत. या इडल्या खूप जड होतात आणि फुलत नाहीत. त्यामुळे ओट्सच्या बरोबरीने साधा तांदूळ किवा ब्राउन राईस वापरावा.

ब्रोकोली पराठा - Broccoli Paratha

Broccoli Paratha in English

४ ते ५ मध्यम पराठे
वेळ: ३० मिनिटे


साहित्य:
::::स्टफिंग::::
१ मध्यम ब्रोकोलीचा गड्डा
१ मध्यम कांदा, बारीक चिरून
२ टीस्पून लसूण पेस्ट
१ टीस्पून आलेपेस्ट
१ टीस्पून गरम मसाला
१/२ टीस्पून आमचूर पावडर
१ टीस्पून मिरची पेस्ट
चवीपुरते मीठ
::::कव्हर::::
१ कप गव्हाचे पीठ
१/४ टीस्पून हळद
१/२ टीस्पून जिरे
१/२ टीस्पून मीठ
१ टीस्पून तेल
::::इतर जिन्नस::::
१/४ कप तेल
कोरडे पीठ पराठे लाटताना

कृती:
१) प्रथम कणिक मळून घ्या. मिक्सिंग बोलमध्ये गव्हाचे पीठ, हळद, जिरे, मीठ आणि तेल घालून मिक्स करावे. पाणी घालून पीठ घट्टसर माळून घ्यावे.
२) ब्रोकोलीचे लहान तुरे करावेत. मिक्सरमध्ये भरडसर वाटून घ्यावे. त्यात चिरलेला कांदा, आलेलसूण पेस्ट, गरम मसाला, मिरची पेस्ट, आमचूर पावडर आणि मीठ घालून मिक्स करावे.
३) ब्रोकोलीचे मिश्रण आणि मळलेली कणिक दोन्ही ५-५ समान भागात विभागावेत. एक कणकेचा गोळा घेउन ३ इंच लाटावा. मध्यभागी ब्रोकोलीच्या मिश्रणाचा एक भाग ठेवून कणकेच्या सर्व बाजू एकत्र करून सील करावे. कोरडे पीठ लावून पराठा लाटावा.
४) तवा तापवून पराठा तेल किंवा तूप सोडून दोन्ही बाजू भाजून घ्याव्यात. पराठा गरमच दही आणि बटर बरोबर सर्व्ह करावे.

टीप:
१) ब्रोकोलीचे स्टफिंग बनवून तसेच जास्त वेळ ठेवले तर त्याला पाणी सुटते आणि पराठे लाटताना फाटतात. यासाठी ब्रोकोली मिक्सरमध्ये बारीक करताना त्यात पाण्याचा अंश नसावा, ती कोरडी असेल याची काळजी घ्यावी. आणि जेव्हा पराठे बनवायचे असतील तेव्हाच स्टफिंग बनवावे.

टोमॅटो राईस - Tomato Rice

Tomato Rice in English

वेळ: १० ते १५ मिनिटे
वाढणी: २ जणांसाठी

साहित्य:
२ कप भात (शक्यतो बासमती)
२ मोठे टोमॅटो, बारीक चिरून
३ ते ४ मोठ्या लसूण पाकळ्या, मध्यम तुकडे
२ टेस्पून तेल किंवा तूप, २ चिमटी जिरे, १/८ टीस्पून हिंग, २ हिरव्या मिरच्या, ७-८ कढीपत्ता पाने
चवीपुरते मीठ
कोथिंबीर बारीक चिरून
कृती:
१) कढईत तूप गरम करून त्यात सर्वात आधी लसूण घालावी. मोठ्या आचेवर परतावे. लसणीच्या कडा गडद ब्राऊन झाल्या पाहिजेत आणि लसणीचा कच्चा वास जावून छान सुगंध आला पाहिजे.
२) लसूण परतली गेली कि जिरे, हिंग, हिरवी मिरची आणी कढीपत्ता घालून थोडावेळ फ्राय करावे.
३) चिरलेले टोमॅटो फोडणीस घालावे, बरोबर मीठही घालावे. झाकण ठेवून मोठ्या आचेवर परतावे. टोमॅटो पूर्ण मऊ होउन कडेने तेल सुटले पाहिजे.
४) यात शिजलेला भात मोकळा करून घालावा आणि मिक्स करावे. टोमॅटोचा तयार मसाला सर्व भाताला व्यवस्थित लागला पाहिजे. झाकण ठेवून दोन-तीन मिनिटे मध्यम आचेवर वाफ काढावी.
कोथिंबिरीने सजवून गरमच सर्व्ह करावे.

टीपा:
१) हिरव्या मिरच्यांऐवजी लाल सुक्या मिरच्यासुद्धा वापरू शकतो.
२) लसूण व्यवस्थित परतली गेली पाहिजे (करपू देउ नये). जर लसूण कच्ची राहिली तर तेवढी चांगली चव भाताला येत नाही.
३) ताजे, लाल, आणि पूर्ण पिकलेले टोमॅटो वापरावेत. त्यामुळे रंग आणि चव दोन्ही छान येते.
४) आवडीप्रमाणे गरम मसाला घालू शकतो. चव छान लागते. पण गरम मसाल्याने टोमॅटोचा स्वाद नाहीसा होतो.

मसूर पुलाव - Masoor Pulao

Masoor Pulao in English

वाढणी: ३ जणांसाठी
वेळ: ४० ते ५० मिनीटे

साहित्य:
::भातासाठी ::
दिड कप बासमती राइस
३ कपा गरम पाणी
१ बादयाण (स्टार आनिस), २ तमालपत्र, 2 लवंगा
१ टेस्पून तूप
१/२ टीस्पून मिठ
::मसूर ग्रेवी ::
१/२ कप मसूर
१ टेस्पून तूप
२ वेलची, २-३ काळी मिरी
१/४ टीस्पून हळद
१ टीस्पून लाल तिखट (मी रंगासाठी १/२ टीस्पून काश्मीरी लाल तिखट आणि तिखटपणासाठी १/२ टीस्पून नेहमीचे लाल तिखट वापरले होते)
१/२ कप बारीक चिरलेला कांदा
१ टीस्पून आलं पेस्ट
१ टीस्पून लसूण पेस्ट
१/२ कप दही
१ टीस्पून धणे पूड
१/२ टीस्पून जिरे पूड
१ टीस्पून गरम मसाला
२ टेस्पून बेदाणे, थोडेसे काजू
चवीपुरते मिठ

कृती:
१) मसूर रात्रभर किंवा ७ ते ८ तास पाण्यात भिजत ठेवावे. कूकरमध्ये १ शिट्टी करून मसूर पाणी ना घालता शिजवून घ्यावे. शिजवताना थोडे मिठ घालावे.
२) पॅनमध्ये तूप गरम करून त्यात वेलची आणि मिरी घालावी. १० सेकंद परतावे. हळद, लाल तिखट आणि आलेलसूण पेस्ट घालून परतावे. कांदा घालून पारदर्शक होईतोवर परतावे.
३) आता शिजलेले मसूर आणि १/२ कप पाणी घालावे. थोडेसेच मिठ घालावे कारण आधी मसूर शिजताना मिठ घातले होते. थोडा वेळ शिजू द्यावे. आता गरम मसाला, धणे-जिरेपूड, बेदाणे, काजू घालून मिक्स करावे. चव पाहून गरजेनुसार मसाला घालावा. गॅसवरून बाजूला काढावे. ही ग्रेव्ही घट्टसरच असावी कारण थंड झाल्यावर यात नंतर दही घालायचे आहे.
४) ग्रेव्ही जरा गार झाली की त्यात घोटलेले दही घालून निट मिकस करावे. लागल्यास थोडे मिठ घालावे.
५) बासमती तांदूळ १० मिनीटे पाण्यात भिजवून ठेवावा. नंतर पाणी काढून टाकावे आणि तांदूळ २० मिनिट्स निथळत ठेवावा.
६) एक मिडीयम सॉसपॅन गरम करावा. त्यात तूप घालून वितळू द्यावे. स्टार आनिस, तमालपत्र, आणि लवंगा घालून १० सेकंद परतावे. निथळलेला तांदूळ घालून चांगला कोरडा होईस्तोवर परतावे. तांदूळ चांगला परतला गेला की तांदळाचे टेक्सचर बदलते.
७) तांदूळ चांगला परतला गेला की गरम पाणी घालावे. ढवळून झाकण न ठेवता मोठ्या आचेवर उकळू द्यावे. भाताच्या पृष्ठभागावर पाणी दिसायचे बंद झाले कि लगेच आच लहान करावी आणि झाकण ठेवून भाताला वाफ काढावी. भात नीट शिजू द्यावा.
शिजलेला भात थोडावेळ तसाच ठेवावा. कारण गरम भातात ग्रेव्ही मिक्स केली तर भाताची शीते मोडतील.
८) काट्याने (फोर्क) भात फ्लफ करून घ्यावा. एकूण ग्रेव्हीतील १/२ ग्रेव्ही घालून भात हलकेच मिक्स करावा. लागेल तशी ग्रेव्ही घालावी.
९) थोडे तूप घालून मिक्स करावे. आणि १० मिनीटे एकदम मंद आचेवर झाकण ठेवून भात गरम होऊ द्यावा.

गरम गरम पुलाव रायत्याबरोबर सेर्व्ह करावा. [रायत्याची रेसिपी]

टीपा:
१) तांदूळ मोठ्या आचेवर ६ ते ८ मिनीटे भाजल्याने भात मोकळा होतो.
२) जर मसूर भिजावायला जास्त वेळ नसेल तर २ तासा एकदम गरम पाण्यात मसूर भिजवावेत.
३) तूप जर कमी वापरायचे असल्यास ग्रेव्ही तेलात बनवावी आणि शेवटी जे तूप घालायचे आहे ते घालू नये.

पालक कॉर्न चिज सॅंडविच - Spinach Corn and cheese Sandwich

Spinach Cheese Sandwich in English

This is a delicious quick breakfast recipe and is equally healthy. You consume quite a good amount of spinach, when you eat 1 sandwich. If eaten moderately, cheese is very good for health as 1 cheese slice has goodness of 1 glass of milk. It's rich in vitamin B and calcium. Try light cheese for less fat and calorie content.

५ सॅंडविचेस
वेळ: १५ मिनीटे

साहित्य:
अडीच कप बारीक चिरलेला पालक
१/४ कप मक्याचे उकडलेले दाणे
२ मोठ्या लसूण पाकळ्या, सोलून बारीक चिरलेल्या
१ हिरवी मिरची, बारीक चिरून
१ टिस्पून बटर (+ अजून थोडे सॅंडविच भाजण्यासाठी)
१/२ कप किसलेले चिज
चवीपुरते मिठ
१० ब्रेडचे स्लाईस

कृती:
१) कढईत १ टिस्पून बटर गरम करावे. त्यात हिरवी मिरची, लसूण घालून १० सेकंद परतावे. नंतर पालक आणि मक्याचे दाणे घालावे.
२) पालक घातल्यावर लगेच मिठ घालावे आणि झाकण न ठेवता पालकातील पाण्याचा अंश निघून जाईस्तोवर परतावे.
३) मिश्रण ५ समभागात विभागून घ्यावे. एका ब्रेड स्लाईसवर १ भाग मिश्रण पसरवावे. त्यावर बर्‍यापैकी चिज घालावे. वरून दुसरा ब्रेड ठेवून सॅंडविच तयार करावे.
४) सॅंडविच टोस्टरमध्ये सॅंडविच टोस्ट करावे. किंवा तव्यावर थोडे बटर घालून मध्यम आचेवर सॅंडविच दोन्ही बाजूंनी खरपूस करून घ्यावे. चिज वितळू द्यावे.
सुरीने दोन भाग करावे. टोमॅटो केचपबरोबर सर्व्ह करावे.

टीपा:
१) पालक एकदम बारीक चिरावा. तसेच पालक शिजला कि आकाराने आळतो. त्यामुळे मिठ अगदी थोडे घाला (२ चिमटी). पालक परतताना कढईवर झाकण ठेवू नये, पालकाचा रंग काळपट होतो.
२) चिज भरपूर घाला. पालक आणि चिज यांचे कॉंबिनेशन फार छान लागते. तसेच, जर चिज कमी घातले तर नुसता पालक आणि ब्रेड खुप चांगले लागत नाही.
३) लहान मुलांसाठी बनवताना मिरची घालू नये.

मूगतांदूळाची खिचडी - Moongdal Khichdi

Moong dal Khichdi in English

वाढणी: २ ते ३ जणांसाठी
वेळ: २० ते २५ मिनीटे

साहित्य:
१ कप तांदूळ
१/२ कप मूग डाळ (टीप १ व २)
तीन ते साडेतीन कप गरम पाणी (टीप ३)
फोडणीसाठी:- १ टेस्पून तेल, २ चिमटी मोहोरी, १/४ टिस्पून जिरे, १ चिमटी हिंग, १/४ टिस्पून हळद, १/४ टिस्पून लाल तिखट
१/२ कप मटार (टीप ५)
१ टिस्पून गोडा मसाला
चवीपुरते मिठ

कृती:
१) खिचडी करायच्या आधी तांदूळ आणि डाळ एकत्र करून पाण्याने स्वच्छ धुवावे. पाणी काढून १/२ तास निथळत ठेवावे.
२) लहान कूकरमध्ये (टीप ६) तेल गरम करावे त्यात मोहोरी, जिरे, हिंग, हळद, आणि तिखट घालून फोडणी करावी. नंतर डाळ आणि तांदूळ घालून परतावे. साधारण ३-४ मिनीटे परतावे. डाळ-तांदूळ चांगले कोरडे झाले पाहिजेत.
३) डाळ तांदूळ परतले कि मटार टाकून थोडासा वेळ आणखी परतावे. नंतर यात गरम पाणी घालावे. गोडामसाला आणि मिठ घालावे. ढवळून पाण्याची चव पाहावी. लागल्यास मिठ, किंवा लाल तिखट घालावे.
४) पाण्याला उकळी आली कि कूकरचे झाकण लावून ३ ते ४ शिट्ट्या होवू द्याव्यात. वाफ मुरली (साधारण १० मिनीटे) कि कूकर उघडून खिचडी सर्व्ह करावी.
खिचडीवर १ चमचा तूप घालावे.

टीप:
१) मूगाच्या पिवळ्या डाळीऐवजी, मूगाची सालासकट डाळ किंवा तूरडाळ, मसूर डाळही वापरता येते.
२) डाळीचे प्रमाण आवडीनुसार कमी-जास्त करता येते.
३) खिचडी जर मऊ हवी असेल तर पाण्याचे प्रमाण थोडे वाढवावे व फडफडीत हवी असल्यास किंचीत कमी करावे.
४) तांदूळ चांगले भाजल्याने खिचडीचा गोळा होत नाही आणि शितं वेगवेगळी राहतात. भाजताना फक्त ते जळणार नाहीत याची काळजी घ्यावी.
५) मटारऐवजी बटाटा, फ्लॉवर, भोपळी मिरची, कांदा, गाजर इत्यादी घालू शकतो.
६) खिचडी कूकर न वापरता थेट पातेल्यातही करता येते. पातेल्यात फोडणी करून त्यात तांदूळ परतावे आणि गरम पाणी व इतर साहित्य नेहमीसारखेच घालावे. फक्त पाणी साधारण तिप्पट लागते. भाजलेल्या तांदूळात पाणी घातले कि झाकण न ठेवता मोठ्या आचेवर शिजवावे आणि पाण्याचे बुडबूडे कमी झाले व पाणी कमी होवून तांदूळ दिसायला लागले कि आच बारीक करून पातेल्यावर झाकण ठेवावे आणि खिचडी शिजू द्यावी. फक्त तूरडाळ वापरणार असाल तर ती आधी पाण्यात भिजवून ठेवावी, कारण ती लगेच शिजत नाही.

स्टफ पनीर पराठा - Stuffed Paneer Paratha

Stuffed Paneer Paratha in English

वेळ: ४० मिनीटे
नग: ६ ते ८ मध्यम पराठे


साहित्य:
स्टफिंग
२ कप किसलेले पनीर
३-४ हिरव्या मिरच्या, एकदम बारीक चिरून किंवा पेस्ट करून
१/४ कप कोथिंबीर, बारीक चिरून
१/२ टिस्पून जिरेपूड, १ टिस्पून धणेपूड, १/२ टिस्पून आमचूर पावडर, १/२ ते १ टिस्पून किसलेले आले
चवीपुरते मिठ
आवरणासाठी
३/४ कप मैदा
१ कप गव्हाचे पिठ
१/४ टिस्पून जिरे, १/४ टिस्पून हळद, १/४ टिस्पून लाल तिखट
१/४ कप दही
गरजेनुसार पाणी
२ टेस्पून तेल
२ टेस्पून कोथिंबीर, बारीक चिरलेली
१/२ टिस्पून मिठ
इतर साहित्य
बटर किंवा तेल पराठे भाजण्यासाठी
पराठे लाटायला थोडे कोरडे पिठ

कृती:
१) किसलेले पनीर एका बोलमध्ये घ्यावे. त्यात मिरची, कोथिंबीर, धणे-जिरेपूड, आमचूर, आलं आणि मिठ घालून हलक्या हाताने मिक्स करावे.
२) बाहेरील कव्हरसाठी मैदा, कणिक, जिरे, हळद, लाल तिखट, दही, कोथिंबीर, तेल आणि मिठ घालून मिक्स करावे. गरजेनुसार पाणी घालून मध्यमसर मळून घ्यावे. १५ मिनीटे झाकून ठेवावे.
३) कणकेचे ६ किंवा ८ समान गोळे करावेत. मिश्रणाचेसुद्धा तितकेच समान भाग करावेत.
४) कणकेचा १ गोळा ३ ते साडेतीन इंचाचा लाटून घ्यावा. त्याच्या मध्यभागी १ भाग मिश्रणाचा ठेवावा. सर्व बाजू एकत्र वरती आणाव्यात आणि गोळा बंद करावा. थोड्या पिठावर लाटून तेलावर किंवा बटरवर दोन्ही बाजूंनी भाजून घ्यावा.
गरमागरम पराठे चटणीबरोबर सर्व्ह करावे.

टीपा:
१) कोथिंबीरीबरोबर आवडत असल्यास पुदीन्याची पाने बारीक चिरून घातली तरी छान स्वाद लागतो.
२) जिरे घालण्याऐवजी ओवा घातला तरी चांगली चव येते.

इंस्टंट रवा इडली - Instant Rava Idli

Rava Idli in English

साधारण १५ ते १८ मध्यम इडल्या
वेळ: साधारण ३५ ते ४० मिनीटे (मिश्रण बनविण्यास १५ मिनीटे + इडली वाफवणे व वाफ जिरणे २० ते २५ मिनीटे)


साहित्य:
१ कप जाड रवा
१ टिस्पून तेल, चिमूटभर मोहोरी, चिमूटभर हिंग, १/२ टिस्पून उडीद डाळ, १/२ ते १ टिस्पून चणाडाळ, ४ ते ५ कढीपत्ता पाने
१/२ टिस्पून किसलेले आले
१/२ कप आंबट दही, घोटलेले
१/२ कप पाणी
चवीपुरते मिठ
१ टिस्पून इनो फ्रुट सॉल्ट (इनो सोडा)

कृती:
१) मध्यम आचेवर, कढईत तेल गरम करून त्यात मोहोरी, हिंग घालावे. आधी चणाडाळ घालून परतावे आणि थोडा रंग बदलला कि उडीद डाळ घालावी. उडीद डाळीचा रंग गुलाबीसर झाला कि कढीपत्ता पाने घालावीत आणि किसलेले आले घालावे. त्यावर १ कप जाड रवा घालून २ ते ३ मिनीटे मध्यम आचेवर भाजावे.
२) भाजलेला रवा एका खोलगट भांड्यात काढून घ्यावा. दुसर्‍या भांड्यात घोटलेले दही आणि पाणी मिक्स करून त्याचे घट्टसर ताक बनवावे. रवा थोडा कोमट झाला कि त्यात हे ताक घालावे (टीप २). चवीपुरते मिठ घालून निट मिक्स करून घ्यावे. मिक्स करून १० मिनीटे तसेच ठेवावे. कंसिस्टन्सी नेहमीच्या इडली पिठाएवढीच असावी, खुप घट्ट किंवा पातळ नसावी.
३) इडली कूकरमध्ये (महत्त्वाची टीप ४) तळाला साधारण दिड इंच पाण्याची पातळी ठेवावी आणि पाणी गरम करण्यास ठेवावे. इडली पात्राला तेलाचा किंचीत हात लावून घ्यावा (टीप ३). मिश्रणात इनो सोडा घालून एकाच दिशेने मिक्स करावे आणि मिश्रण इडली पात्रात भरावे.
४) पाण्याला उकळी फुटली कि इडली स्टॅंड कूकरमध्ये ठेवून १२ ते १५ मिनीटे इडल्या वाफवाव्यात. ८ ते १० मिनीटे वाफ जिरल्यावर कूकर उघडून इडल्या चमच्याच्या टोकाने व्यवस्थित सोडवून घ्याव्यात.

टीप:
१) वरील पाककृती साधी मसाला इडलीची आहे. जर हवे असल्यास किसलेले गाजर, मटार अशा भाज्याही इडलीत घालू शकतो. वरील फोटोत दाखवल्याप्रमाणे भाज्या दिसायला हव्या असतील तर, इडली साच्यात आधी चिरलेल्या किंवा किसलेल्या भाज्या ठेवून वर इडलीचे पिठ घालावे. तसेच इडली पिठात डायरेक्ट भाज्या मिक्स करू शकतो, पण त्यामुळे इडल्यांचा रंग बदलतो.
२) रवा जर थोडा जास्त भाजला गेला असेल तर पाणी शोषून घेतल्याने मिश्रण घट्ट होते, तेव्हा कदाचित थोडे पाणी जास्त घालावे लागेल. मिश्रणाची कंसिस्टन्सी नेहमीच्या इडली पिठाएवढीच असावी, खुप घट्ट किंवा पातळ नसावी.
३) जर तुमच्या इडली पात्रात कमी इडल्या बनत असतील तर मिश्रण २ भागात विभागून घ्यावे. एक भागात १/२ टिस्पून सोडा घालून इडल्या वाफवून घ्याव्यात आणि नंतर उरलेल्या मिश्रणात सोडा घालून इडल्या बनवाव्यात. अशाप्रकारे २ बॅचेस कराव्यात. सर्व मिश्रणात एकदम सोडा घालू नये.
४) जर साधा कूकर वापरणार असाल तर कूकरच्या झाकणाची शिट्टी काढून ठेवावी.

दलिया इडली - Daliya idli

Daliya Idli in English

वेळ: पूर्वतयारी- २० मिनीटे (दलिया भिजवणे वगळून) । पाकृसाठी- ३५ ते ४० मिनीटे
नग: १५ ते १७ मध्यम इडल्या


साहित्य:
१ कप दलिया रवा
२ कप गरम पाणी
फोडणीसाठी: १ टेस्पून तेल, २ चिमटी मोहोरी, २ चिमटी हिंग, २ हिरव्या मिरच्या
४ ते ५ कढीपत्ता पाने, बारीक चिरून
१/२ टिस्पून उडीद डाळ, १/२ टिस्पून चणाडाळ
१ टिस्पून किसलेले आले
१/२ कप आंबट दही
चवीपुरते मिठ
१ टिस्पून इनो सोडा
इडली स्टॅंड
इडल्या वाफवायला इडली कूकर किंवा साधा मोठा कूकर

कृती:
१) दलिया गरम पाण्यात ४ तास भिजत घालावा. दलिया भिजल्यानंतर त्यातील अधिकचे पाणी काढून ठेवावे, पुर्ण पाणी काढले नाही तरी चालेल (टीप १). पाणी काढलेला दलिया मिक्सरमध्ये मध्यम वाटून घ्यावा.
२) कढल्यात तेल गरम करावे. त्यात आधी डाळी घालून गुलाबी होईस्तोवर परताव्या. नंतर मोहोरी, हिंग, मिरची आणि कढीपत्ता घालून फोडणी करावी. हि फोडणी वाटलेल्या दलियामध्ये घालावी.
३) यामध्ये दही, किसलेले आले आणि मिठ घालून मिक्स करावे. मिश्रण तांदूळाच्या इडलीसाठी जे मिश्रण असते तितपतच दाट असावे. लागल्यास दलिया भिजवून जे पाणी ठेवले होते ते घालावे.
४) कूकरमध्ये तळाला अडीच ते ३ इंच पातळीपर्यंत पाणी घालावे. गॅस सुरू करावा. इडली पात्राला तेलाचा हात लावून घ्यावा.
५) मिश्रणाचे दोन भाग करावे (टीप ६). एका भागात १/२ टिस्पून सोडा घालावा. मिक्स करून इडली पात्रात भरावे.
६) कूकरमधील पाण्याला उकळी आली कि इडली स्टॅंड कूकरमध्ये ठेवावा. वरून झाकण लावावे. साधा कूकर वापरत असाल तर झाकणावरची शिट्टी काढून ठेवावी.
७) १२ ते १५ मिनीटे वाफवावे. गॅस बंद करून ७-८ मिनीटे वाफ जिरू द्यावी.
८) नंतर इडल्या चमच्याने काढाव्यात (टीप २). परत कूकरमध्ये पाणी गरम करून वरीलप्रमाणेच इडल्यांची दुसरी बॅच करावी.

टीप:
१) दलिया भिजवल्यावर जर जास्त पाणी उरले तर ते फेकून न देता सांबार बनवायला वापरावे. मी वापरले होते, चवीत फरक पडत नाही.
२) या इडल्या अख्ख्या गव्हाच्या असल्याने थोड्या चिकट राहतात व जास्त फुलत नाही. म्हणून पूर्ण वाफ मुरल्यावरच इडल्या चमच्याने काढाव्यात. थंड झाल्या तरी मायक्रोवेव्हमध्ये गरम करू शकतो.
३) या इडल्या जरा सालट लागतात. म्हणून शक्यतो या इडल्या फक्त चटणीबरोबर खाऊ नयेत. जोडीला सांबारही बनवावे.
४) डायबेटीस पेशंट्स किंवा ज्यांना तांदूळ न खायचे पथ्य आहे त्यांच्यासाठी न्याहारीचा उत्तम उपाय.
५) यामध्ये आवडीनुसार भाज्याही घालू शकतो.
६) माझ्याकडे असलेला इडली स्टॅंड लहान आहे आणि त्यात नऊच इडल्या होतात. तुमच्याकडे जर १२ किंवा १६ कप्प्यांचा स्टॅंड असेल तर एकाच वेळी तुम्ही सर्व इडल्या करू शकता.

नारळी भात - Narali Bhat

Narali Bhat in English

वेळ: साधारण ४५ ते ५० मिनीटे(पूर्वतयारी: २० ते ३० मिनीटे । पाककृतीस लागणारा वेळ: २५ मिनीटे)
वाढणी: २ ते ३ जणांसाठी

साहित्य:
३/४ कप तांदूळ
दिड कप पाणी
२ + १ टेस्पून साजूक तूप
२ ते ३ लवंगा
१/४ टिस्पून वेलची पूड
१ कप गूळ, किसलेला (टीप २)
१ कप ताजा खोवलेला नारळ
८ ते १० काजू
८ ते १० बेदाणे

कृती:
१) तांदूळ धुवून चाळणीत अर्धा ते पाऊण तास निथळत ठेवावेत.
२) पातेल्यात २ टेस्पून तूप गरम करावे. लवंग घालून काही सेकंद परतावे. निथळलेले तांदूळ घालून २-३ मिनीटे मध्यम आचेवर परतावे.
३) तांदूळ परतत असतानाच दुसर्‍या गॅसवर दिड कप पाणी गरम करावे.
४) गरम पाणी परतलेल्या तांदूळात घालावे. पातेल्यावर झाकण ठेवून मध्यम आचेवर भात शिजवावा. भात शिजला कि हलक्या हाताने एका थाळीत काढून मोकळा करावा. शिते मोडणार नाहीत याची खबरदारी घ्यावी.
५) नारळ आणि गूळ एकत्र मिक्स करावे. भात गार झाला कि हे मिश्रण भातात अगदी हलक्या हाताने मिक्स करावे.
६) जाड बुडाचे पातेले गरम करावे. त्यात तूप गरम करून काजू आणि बेदाणे गुलाबी रंगावर तळून घ्यावे.
७) झार्‍याने काजू आणि बेदाणे दुसर्‍या वाटीत काढावे. गॅस मंद करून उरलेल्या तूपात भात-नारळ-गूळ यांचे मिश्रण घालावे. वेलचीपूड घालावी. घट्ट झाकण ठेवून ३-४ वाफा काढाव्यात. मधून मधून हलकेच भात वरखाली करावा. साधारण १० ते १५ मिनीटे शिजवावे.
८) भात सुरूवातीला थोडा पातळ होईल आणि काही मिनीटांनी आळेल. शेवटची २-३ मिनीटे झाकण न ठेवता भात शिजवा. तळलेले काजू, बेदाणे घालावे. सर्व्ह करताना तूप घालून सर्व्ह करावे.

टीप्स:
१) गूळ-नारळ-भात यांचे मिश्रण शिजवताना गूळ वितळल्याने सुरूवातीला ते पातळ होते. काहीवेळ शिजवल्यावर ते आळत जाईल. तसेच नारळीभात तयार झाल्यावर शेवटची काही मिनीटे झाकण न ठेवता शिजवावे म्हणजे अधिकचा ओलसरपणा निघून जाईल.
२) जर नारळीभात खुप गोड नको असेल तर गूळाचे प्रमाण १ कप ऐवजी पाऊण कप वापरा.
३) जर नारळीभात तयार झाल्या झाल्या लगेच चव पाहिली तर प्रचंड गोड लागेल, पण काही कालावधीनंतर गुळाचा पाक भातात मुरल्याने गोडपणा काहीप्रमाणात कमी होतो.
४) तांदूळ परफेक्ट शिजवावा. कमी शिजलेल्या भाताची शिते, गूळाच्या संपर्कात आल्यामुळे कडकडीत होतात. तसेच जास्त शिजलेल्या भाताचा, गूळ आणि नारळ घालून शिजवल्यावर गोळा होतो आणि शिते आख्खी राहात नाहीत.
५) भात शिजवताना थोडे केशर घातल्यास स्वाद आणि रंग छान येतो.

Labels:
coconut rice, narali bhat, narali paurnima, raksha bandhan

माणिकमोती - Manikmoti

Manikmoti in English
२ जणांसाठी
वेळ: १५ मिनीटे

साहित्य:
४ आदल्या दिवशीच्या पोळ्या (चपात्या)
१ कप शिजलेला भात (आदल्या दिवशीचा)
फोडणीसाठी: २ टेस्पून तेल, १/८ टिस्पून मोहोरी, १/४ टिस्पून जिरे, चिमूटभर हिंग, १/८ टिस्पून हळद, १/४ टिस्पून लाल तिखट, ३-४ कढीपत्ता पाने
२ टेस्पून शेंगदाणे
२ ते ३ टेस्पून मटार
१/४ कप बारीक चिरलेला कांदा
१ टिस्पून लिंबाचा रस
चवीपुरते मिठ
१/२ टिस्पून साखर
सजावटीसाठी बारीक चिरलेली कोथिंबीर आणि खोवलेला नारळ

कृती:
१) पोळ्यांचा हाताने कुस्कारा करून घ्यावा किंवा मिक्सरमध्ये भरडसर बारीक करावे. भात हाताने मोकळा करून घ्यावा.
२) कढईत तेल गरम करून आधी त्यात शेंगदाणे परतून घ्यावे. नंतर त्यातच मोहोरी, जिरे, हिंग, हळद, लाल तिखट आणि कढीपत्ता पाने घालून फोडणी करावी. त्यात कांदा आणि मटार घालून परतावे. अंदाजे मिठ घालावे.
३) कांदा निट परतला गेला गॅस मध्यम करून त्यात भात घालावा. निट मिक्स करून बारीक केलेल्या पोळ्या घालून निट परतावे. साखर घालून १ वाफ काढावी. लिंबाचा रस चवीनुसर घालावा.
कोथिंबीर आणि ओल्या खोबर्‍याने सजवावे. गरमागरम सर्व्ह करावे.

labels:
phodnicha bhat, phodnichi poli, fodani chi poli

टोफू पराठा - Tofu Paratha

Tofu Paratha in English

वेळ: पिठ मळण्यासाठी: १० मिनीटे । पराठे बनवण्यासाठी: १५ मिनीटे
६ ते ७ मोठे पराठे (१० इंच प्रत्येकी)

साहित्य:
१५० ग्राम टोफू (मी फर्म टोफू वापरला होता) (टीप १)
१ गाजर, किसलेले
दिड ते दोन कप कणिक (टीप २)
दही (टीप ३)
१/२ कप बारीक चिरलेली कोथिंबीर
३ ते ४ हिरव्या मिरच्या, एकदम बारीक चिरून
१ टिस्पून धणेजिरे पूड
१/४ टिस्पून हळद
चिमूटभर हिंग
चवीपुरते मिठ
पराठे भाजण्यासाठी तेल (साधारण १/४ कप)

कृती:
१) टोफू हलक्या हाताने दाबून त्यातील पाणी काढून टाकावे. परातीत किंवा खोलगट भांड्यात घेऊन टोफू कुस्करून घ्यावा.
२) त्यात कणिक घालून हलकेच मिक्स करावे. नंतर किसलेलेल गाजर मिरच्या, धणेजिरेपूड, हळद, हिंग, मिठ, कोथिंबीर घालावे चांगले मळावे आणि गरजेप्रमाणे दही घालून पराठ्यासाठी कणिक मळून घ्यावी. खुप घट्ट मळू नये त्यामुळे पराठे कोरडे होवू शकतात.
३) मळलेले पिठ १० मिनीटे झाकून ठेवावे. नंतर तेलाचा हात घेऊन २ ते अडीच इंचाचे समान गोळे बनवावे. तवा गरम करावा. कोरडी कणिक लावून पराठे लाटावेत आणि मध्यम आचेवर पराठे भाजून घ्यावेत. पराठे भाजताना कडेने थोडे तेल किंवा बटर घालावे त्यामुळे खमंग स्वाद येतो आणि पराठे मऊ राहतात.

टीप:
१) या पराठ्यांसाठी फर्म टोफू किंवा सिल्कन टोफू, कोणताही प्रकार वापरला तरी चालेल. घरी फर्म टोफू अव्हेलेबल होता म्हणून मी तोच वापरला. सिल्कन टोफू टेक्श्चरला एकदम मऊसूत असतो. म्हणून जर तुम्ही पराठे बनवण्यासाठी खास टोफू आणणार असाल तर शक्यतो सिल्कन टोफू आणा.
२) दही, टोफू यांच्यातील पाण्याच्या अंशानुसार गव्हाचे पिठ थोडे कमी किंवा जास्त लागू शकते.
३) टोफूच्या टेक्श्चरवर दह्याचे प्रमाण अवलंबून आहे. वरील प्रमाणानुसार मला साधारण ३ टेस्पून दही लागले होते.
३) टोफूऐवजी पनीर वापरले तरीही छान चव येते.

Labels:
Tofu recipe, Tofu Paratha, Paratha recipe