चिली गार्लिक टोफू - Chili Garlic Tofu

Chili Garlic Tofu in English

वेळ: २५ मिनिटे
वाढणी: २ जणांसाठी

साहित्य:
५ औंस फर्म टोफू (साधारण १०-१२ मध्यम तुकडे )
१ टेस्पून कॉर्न स्टार्च
४ टीस्पून तेल
१ टीस्पून लसूण पेस्ट
१ टीस्पून आले पेस्ट
२ टीस्पून चिली गार्लिक पेस्ट
१/४ कप पाती कांद्याचा हिरवा भाग, बारीक चिरून
१/४ कप कांदा, मध्यम आकाराचे तुकडे (कांद्याच्या पाकळ्या विलग करा)
१/४ कप भोपळी मिरची, मध्यम तुकडे
१ टीस्पून सॉय सॉस
१/२ टीस्पून व्हिनेगर
चवीपुरते मीठ

कृती:
१) टोफू हलक्या हाताने प्रेस करून त्यातील थोडे पाणी काढून टाकावे. खूप जास्त प्रेस करू नये त्यामुळे टोफू कुस्करला जाउ शकतो. टोफूचे १ इंचाचे तुकडे करावेत. त्यावर कॉर्न स्टार्च भुरभुरावा. आणि हलकेच मिक्स करावे.
२) एक मध्यम पॅन घेउन त्यात १ टेस्पून तेल घालावे. त्यात टोफू शालो-फ्राय करून घ्यावा. सर्व बाजू थोड्या ब्राउन करून घ्यावात. शालो फ्राय करून झाले कि टोफू प्लेटमध्ये काढून ठेवावा.
३) त्यात पॅनमध्ये अजून १ टीस्पून तेल घालावे. त्यात आले लसूण पेस्ट परतावी. सॉय सॉस, भोपळी मिरची आणि कांदा घालून एक मिनिटभर परतावे. मीठ घालावे. कांदा आणि भोपळी मिरची क्रिस्पी राहिल्या पाहिजेत.
४) १ टीस्पून कॉर्न स्टार्च आणि ३ ते ४ टेस्पून पाणी घालून मिक्स करावे. हे मिश्रण पॅनमध्ये घालावे. चिली गार्लिक पेस्ट आणि व्हिनेगर घालावे. मिक्स करावे.
५) आता शालो फ्राय केलेला टोफू घालावा. हलकेच मिक्स करून मिनिटभर शिजवावे. प्लेटमध्ये सर्व्ह करावे. सर्व्ह करताना पाती कांद्याची चिरलेली पात घालून सजवावे.

टीपा:
१) वरील रेसिपी ड्राय टोफूची आहे. थोडी ग्रेव्ही हवी असेल १ टेस्पून कॉर्न स्टार्च १/२ कप पाण्यात घालून मिक्स करावे. आणि स्टेप ४ मध्ये चिली गार्लिक पेस्टसोबत हे मिश्रणही घालावे. बाकी सर्व कृती सेम. या ग्रेहीबरोबर थोडा पांढरा भातही सर्व्ह करू शकतो.
२) वरील रेसिपीसाठी "फर्म टोफू" च वापरावा. इतर टोफू एकदम मऊ असतात आणि फ्राय करता येत नाहीत.

टोफू पराठा - Tofu Paratha

Tofu Paratha in English

वेळ: पिठ मळण्यासाठी: १० मिनीटे । पराठे बनवण्यासाठी: १५ मिनीटे
६ ते ७ मोठे पराठे (१० इंच प्रत्येकी)

साहित्य:
१५० ग्राम टोफू (मी फर्म टोफू वापरला होता) (टीप १)
१ गाजर, किसलेले
दिड ते दोन कप कणिक (टीप २)
दही (टीप ३)
१/२ कप बारीक चिरलेली कोथिंबीर
३ ते ४ हिरव्या मिरच्या, एकदम बारीक चिरून
१ टिस्पून धणेजिरे पूड
१/४ टिस्पून हळद
चिमूटभर हिंग
चवीपुरते मिठ
पराठे भाजण्यासाठी तेल (साधारण १/४ कप)

कृती:
१) टोफू हलक्या हाताने दाबून त्यातील पाणी काढून टाकावे. परातीत किंवा खोलगट भांड्यात घेऊन टोफू कुस्करून घ्यावा.
२) त्यात कणिक घालून हलकेच मिक्स करावे. नंतर किसलेलेल गाजर मिरच्या, धणेजिरेपूड, हळद, हिंग, मिठ, कोथिंबीर घालावे चांगले मळावे आणि गरजेप्रमाणे दही घालून पराठ्यासाठी कणिक मळून घ्यावी. खुप घट्ट मळू नये त्यामुळे पराठे कोरडे होवू शकतात.
३) मळलेले पिठ १० मिनीटे झाकून ठेवावे. नंतर तेलाचा हात घेऊन २ ते अडीच इंचाचे समान गोळे बनवावे. तवा गरम करावा. कोरडी कणिक लावून पराठे लाटावेत आणि मध्यम आचेवर पराठे भाजून घ्यावेत. पराठे भाजताना कडेने थोडे तेल किंवा बटर घालावे त्यामुळे खमंग स्वाद येतो आणि पराठे मऊ राहतात.

टीप:
१) या पराठ्यांसाठी फर्म टोफू किंवा सिल्कन टोफू, कोणताही प्रकार वापरला तरी चालेल. घरी फर्म टोफू अव्हेलेबल होता म्हणून मी तोच वापरला. सिल्कन टोफू टेक्श्चरला एकदम मऊसूत असतो. म्हणून जर तुम्ही पराठे बनवण्यासाठी खास टोफू आणणार असाल तर शक्यतो सिल्कन टोफू आणा.
२) दही, टोफू यांच्यातील पाण्याच्या अंशानुसार गव्हाचे पिठ थोडे कमी किंवा जास्त लागू शकते.
३) टोफूच्या टेक्श्चरवर दह्याचे प्रमाण अवलंबून आहे. वरील प्रमाणानुसार मला साधारण ३ टेस्पून दही लागले होते.
३) टोफूऐवजी पनीर वापरले तरीही छान चव येते.

Labels:
Tofu recipe, Tofu Paratha, Paratha recipe

टोफू फ्राईड राईस - Tofu Fried Rice

Tofu Fried Rice in English
२ ते ३ जणांसाठी
वेळ: ३५ मिनिटे

साहित्य:
१ कप जस्मिन राईस
३ टेस्पून तेल
३ ते ४ मोठ्या लसूण पाकळ्या
२ हिरव्या मिरच्या
१ टिस्पून सोयासॉस
१ टिस्पून चिंचेचा कोळ
१ टिस्पून साखर
१/४ कप भोपळी मिरची (उभी चिरलेली)
१/४ कप कांदा (पातळ उभा चिरलेला)
१/२ ते ३/४ कप टोफू (१ इंच चौकोनी तुकडे)
३/४ कप बेसिलची पाने
१ लहान गाजर (चौकोनी तुकडे)
१/४ कप मटार (ऐच्छिक)
चवीपुरते मिठ

कृती:
१) जस्मिन राईस धुवून घ्यावा. दिड ते दोन कप पाणी गरम करावे त्यात थोडे मिठ घालावे. पाणी उकळले कि त्यात धुतलेला जस्मिन राईस घालून गॅस मध्यम करावा. वर झाकण ठेवून भात मोकळा शिजवून घ्यावा.
२) टोफूचे तुकडे कमी तेलावर शालोफ्राय करून घ्यावेत.
३) लसूण पाकळ्या आणि हिरव्या मिरच्या एकत्र वाटून घ्याव्यात. तेल गरम करून त्यात लसूण मिरचीचे वाटण घालून परतावे नंतर गाजराचे तुकडे घालून ३० सेकंद परतावे.
४) त्यात भोपळी मिरची, कांदा घालून फक्त १० सेकंद परतावे. कांदा आणि भोपळी मिरचीचा करकरीतपणा तसाच राहिला पाहिजे. लगेच भात, चिंचेचा कोळ, साखर, सोयासॉस आणि लागल्यास मिठ घालावे आणि निट मिक्स करावे. घातलेले जिन्नस भाताला सारखे लागले पाहिजेत.
५) भात निट मिक्स केल्यावर बेसिलची पाने आणि शालोफ्राय केलेला टोफू घालून अलगद मिक्स करावे आणि लगेच सर्व्ह करावे.

टीप:
१) टोफू घातल्यावर हलक्या हातानेच मिक्स करावे नाहीतर टोफू मोडला जातो.
२) बेसिलची पाने घातली खुप जास्तवेळ मिक्स करू नये त्यामुळे उष्णतेने ती कोमेजतात.
३) जरा वेगळी चव देण्यासाठी मी यात चिंचेचा कोळ घातला आहे, पण आपल्या आवडीप्रमाणे चिंचेच्या कोळाऐवजी अर्धा टिस्पून विनेगरही घालू शकतो. थाई फ्राईड राईसमध्ये खरंतर फिशसॉस वापरतात. फिशसॉसला थोडी आंबटसर चव असते. नॉनवेज लोकांनी चिंच, विनेगर ऐवजी फिशसॉस वापरला तरीही हरकत नाही.
४) जस्मिन राईस नेहमीच्या भातापेक्षा जड असतो आणि पटकन पोटही भरते त्यामुळे त्या अंदाजाने भात शिजवावा.

Labels:
Tofu Fried Rice, Basil Fried Rice, Vegetarian Fried Rice