सॉर क्रीम कॉफी केक - Sour Cream Coffee Cake

Sour Cream Coffee Cake in English

वेळ: ६० ते ७० मिनिटे
१० जणांसाठी

साहित्य:
टॉपींगसाठी::
१/४ कप ब्राउन शुगर, चेपून भरलेली
१ टीस्पून दालचीनी पुड
३/४ कप अक्रोड
केकसाठी::
१ कप घट्टसर सॉर क्रीम
१ टीस्पून बेकिंग सोडा
१ + ३/४ कप मैदा
दीड टीस्पून बेकिंग पावडर
१/२ कप अनसॉल्टेड बटर, रूम टेम्प.
१ कप साखर
१/२ टीस्पून मीठ
२ मोठी अंडी
२ टीस्पून वनिला एक्सट्रॅक्ट

कृती:
ओव्हन ३५० F वर प्रीहिट करावे.
१) टॉपींग: अक्रोड ओव्हनमध्ये ८ ते १० मिनिटे टोस्ट करून घ्यावे. अक्रोड टोस्ट झाले कि बाहेर काढून थोडे गार होवू द्यावे. शार्प सुरीने भाजलेले अक्रोड भरडसर चिरावे. किंवा मिक्सरमध्ये अगदी किंचित फिरवावे. आपल्याला थोडा भरडसर अक्रोड हवे आहेत. यात दालचीनी पावडर आणि ब्राउन शुगर घालून मिक्स करावे. हे मिश्रण केकचे मिश्रण तयार होईस्तोवर बाजूला ठेवावे.
२) मध्यम वाडग्यामध्ये सॉर क्रीम आणि बेकिंग सोडा एकत्र करून मिक्स करावे.
३) दुसऱ्या एका भांड्यात मैदा आणि बेकिंग पावडर एकत्र चाळून घ्यावे.
४) एका मोठ्या मिक्सिंग बोलमध्ये बटर, साखर, आणि मीठ एकत्र करून मिश्रण हलके होईस्तोवर फेटावे (साधारण २ ते ४ मिनिटे). एक अंडे फोडून घालावे. मिक्स करून दुसरे अंडे घालावे. वानिला इसेन्सही घालावे आणि फेटावे.
५) मैदा ३ बॅचेसमध्ये घालावा. प्रत्येक बॅच नंतर अर्धे सॉर क्रीम घालावे आणि मिक्स करावे.
६) २ बेकिंग पॅन घ्यावेत (८" x ८" x २"). पॅनला आतून चांगले बटर लावून घ्यावे. मिश्रणाचे २ सारखे भाग करून पॅनमध्ये घालावे. ओव्हनमध्ये साधारण ३० ते ३५ मिनिटे बेक करावे. (३० मिनीटांनंतर केक बाहेर काढून विणकामाच्या सुईने किंवा स्क्युअरने केकच्या मध्यभागी आतपर्यंत टोचून पहावे. सुई जर एकदम क्लीन बाहेर आली तर केक झाला. सुईवर जर ओलसर केक बॅटर लागलेले असेल तर अजून काही मिनिटे केक बेक करावा.)
केक बेक झाल्यावर गार होवू द्यावा. सुरीने पॅनच्या कडेने सोडवून घ्यावा. कापून सर्व्ह करावा.

टीप:
१) जास्त खोलगट केक टीन असेल आणि केक एकाच भांड्यात करायचा असेल तर बेकिंगसाठी ४५ ते ५० मिनिटे लागतील. तसेच या केकला तयार टॉपींगचा आणखी एक लेयर देउ शकतो. त्यासाठी अर्धे बॅटर केक टीनमध्ये घालून त्यावर एकूण टॉपींगपैकी अर्धे टॉपींग घालावे त्यावर बॅटर घालून वरती परत टॉपींग घालावे. केक बेक करावा.
२) सॉर क्रीमला घट्ट आंबट दही पर्याय म्हणून वापरू शकतो. (दही आंबट असावे, आंबूस वास येत असलेले दही वापरू नये.)

पाईनॅपल पेस्ट्री - Pineapple layer cake Pastry

Pineapple Pastry in English

वेळ: १५ मिनिटे

साहित्य:
८ oz व्हीप क्रीम (कूल व्हीप)(टीप १ आणि २)
२ ते ३ टेस्पून पिठी साखर
४ ते ५ थेंब पाईनॅपल इसेन्स
१/४ कप पाईनॅपलचे छोटे तुकडे
८ ते १० ग्लेझ चेरीज
२ पाईनॅपल स्पंज केकच्या आयताकृती शीट्स (८ x ४ x १) (टीप ३ )
१० x १० इंचाचा चौकोनी कार्डबोर्ड (पुठ्ठा), अलुमिनियम फॉईलमध्ये रॅप केलेला

कृती:
१) व्हीप क्रीममध्ये पाईनॅपल इसेन्स आणि साखर घालून हलकेच मिक्स करावे. जोरजोरात फेटू नये. व्हीप्प क्रीमचे फोमी टेक्स्चर निघून जाते. आणि मोजक्याच वेळा मिक्स करावे.
२) कार्डबोर्डवर एक केकची शीट ठेवावी. त्यावर व्हीप क्रीम पसरावे. आणि अननसाचे तुकडे घालावेत.
३) त्यावर दुसरी केकची शीट ठेवावी. त्यावरही व्हीप क्रीम पसरावे आणि उभ्या चारही बाजूंना व्हीप क्रीमचा समान थर लावावा.
४) आयसिंग बॅग असल्यास त्यात व्हीप क्रीम भरून केक डेकोरेट करावा. वरती अननसाचे तुकडे आणि चेरी यांनी केक सजवावा. कापून लगेच सर्व्ह करावा किंवा फ्रीजमध्ये ठेवावा.

टीपा:
१) रूम टेम्परेचरला व्हीप क्रीम वितळते, म्हणून व्हीप क्रीम हाताळताना जलद गतीने काम करावे. आधी सर्व साहित्य तयार ठेवून मगच व्हीप क्रीम फ्रीजच्या बाहेर काढावे.
२) मी रेडीमेड व्हीप क्रीम वापरले होते. जर व्हीप क्रीम घरी बनवायचे असेल तर हेवी क्रीम आणावे. हेवी क्रीम आणि काचेचे एक खोलगट भांडे एकदम थंड करावे. बाहेर काढून लगेच हॅंड मिक्सरने फेटावे. क्रीम सॉफ्ट पिकला पोहोचले कि त्यात २टेस्पून साखर आणि थोडा पाईनॅपल इसेन्स घालावा. क्रीम केकवर पसरण्याइतपत घट्ट आणि फोमी होईस्तोवर फेटावे.
३) केकचे मिश्रण केक टीनमध्ये ओतल्यावर आत हवेचे बुडबुडे राहिले असले तर बेक करताना ते बाहेर पडतात आणि केकवर टेकडीसारखा बंप तयार होतो. जेव्हा पेस्ट्री बनवाची असते तेव्हा प्लेन सरफेसचा केक लागतो. म्हणून हा उंचवटा सुरीने कापून केक प्लेन करावा. नंतर चौरस आकाराचा केक मधोमध कापून दोन समान आयात तयार करावेत. अशाप्रकारे दोन समान आयताकृती केक शीट मिळतील.

पाईनॅपल केक - Pineapple Flavored Cake (With Egg)

Pineapple Flavored Cake recipe in English

वेळ: पूर्वतयारी- २० मिनिटे | बेकिंगसाठी- ५० मिनिटे
१५ ते १६ पिसेस


हा केक अंडी न वापरताही करू शकतो. रेसिपी लिंक आणि काय काय बदल करावे ते टीप नंबर ५ मध्ये लिहिले आहे

साहित्य:
दीड कप मैदा
दीड स्टिक अनसॉल्टेड बटर, रूम टेम्परेचर (दीड स्टिक = ३/४ कप)
१ कप ग्रानुलेटेड साखर
३ मध्यम अंडी (रूम टेम्परेचर)
१/४ ते १/२ टीस्पून पाईनॅपल इसेन्स
१ टीस्पून बेकिंग पावडर
१ टीस्पून बेकिंग सोडा
२ टेस्पून दही
१/२ कप दूध (रूम टेम्परेचर)
चिमूटभर मीठ
कृती:
१) ओव्हन ३५० F (१७५ C) किमान १० मिनिटे प्रीहिट करावे. ८" x ८" चा पॅन आतून बटर लावून ग्रीस करावा.
२) मैदा, बेकिंग सोडा, बेकिंग पावडर, आणि मीठ चाळणीतून दोनदा चाळून घ्यावे. जर बेकिंग पावडरचे बारीक गोळे असतील तर हाताने फोडावेत.
३) मोठ्या ग्लास बोलमध्ये साखर आणि बटर घालावे. हॅंड मिक्सरने किंवा इलेक्ट्रॉनिक स्टॅंड मिक्सरने मध्यम स्पीडवर मिश्रण फेटावे. मिश्रण क्रिमी होईस्तोवर फेटावे. १ ते २ मिनिट लागतील.
४) आता अंडी फोडून घालावीत. आणि परत फेटावे. मिश्रण एकदम हलके आणि फ्लफी होईल. मिश्रण फ्लफी झाले कि फेटणे थांबवावे. {अंडी किंवा बटर प्रमाणाबाहेर फेटल्यास विलग होउन मिश्रण फाटल्यासारखे दिसते.}
५) दही आणि पाईनॅपल इसेन्स घालावा. मैदा आणि दुध ३ बॅचेसमध्ये आलटून पालटून घालावे. मैदा नीट मिक्स होईस्तोवरच मिश्रण फेटावे.
६) बटर लावलेल्या पॅनमध्ये मिश्रण ओतावे. मिश्रण सर्वत्र सारखे पसरले पाहिजे. त्यासाठी लाकडी किंवा प्लास्टिक कालथ्याने मिश्रण एकसारखे पसरवा. पृष्ठभाग प्लेन करा.
७) पॅन ओव्हनमध्ये मधल्या रॅकवर ठेवून ओव्हन बंद करा. ४० ते ४५ मिनिटे बेक करा.
८) ४० मिनिटानंतर केकच्या मध्यभागी स्क्यूअरने आतपर्यंत टोचून बाहेर काढा. जर स्क्यूअरवर केकचे बॅटर लागले असेल तर अजून ७-८ मिनिटे बेक करा आणि परत मध्यभागी "स्वच्छ" केलेली स्क्यूअर टोचून पहा. जर त्यावर केक बॅटरचा अजिबात अंश नसेल तर केक झाला असे समजावे.
साधारण ४५ मिनिटात केक बेक होतो.

टीपा:
१) केक बॅटरमध्ये फ्रेश अननसाचे तुकडे घालू नकात. अननसातील रसामुळे केक आतून ओला राहतो. वाटल्यास सुकवलेले अननसाचे तुकडे वापरू शकता.
२) एकदा का मिश्रण बेकिंगसाठी ओव्हनमध्ये गेले कि ओव्हन उघडू नये. आतील तापमान कमी झाल्याने केक बेक होण्यात बाधा निर्माण होते.
३) जर एकदम मोठी अंडी वापरत असाल तर ३ ऐवजी २ अंडी पुरे होतील.
४) दही (आंबट पदार्थ) घातल्याने बेकिंग सोडा कार्यरत होउन कार्बन डाय ऑक्साईड वायू तयार करतो. ज्यामुळे केक फ्लफी होतो. फक्त मिक्सिंगचे काम जमेल तेवढ्या जलद करावे म्हणजे बेकिंग सोड्याचा परिणाम जास्त चांगला होईल.
५) एगलेस केक रेसिपीसाठी इथे क्लिक करा
फक्त वानिला इसेंसऐवजी पाईनॅपल इसेन्स वापरा. "एगलेस केक" रेसिपीमध्ये दिलेले साहित्याचे प्रमाण हे वरील रेसिपीपेक्षा निम्मे आहे. त्यानुसार आठच केक पिसेस होतील म्हणून जर १६ पिसेस हवे असतील तर प्रमाण दुप्पट करा.

प्रेशर कूकरमधील केक - Pressure Cooker Cake

Cake in Pressure cooker in English

८ ते १० मध्यम तुकडे
पूर्वतयारी - २५ ते ३० मिनीटे । बेकिंगसाठी - ३५ मिनीटे

साहित्य:
३/४ कप मैदा
२५० ते ३०० ग्राम कंडेन्स मिल्क (१/२ ते ३/४ कप )
१/४ कप बटर (मिठविरहित)
१/२ टिस्पून बेकिंग पावडर
१/२ टिस्पून बेकिंग सोडा
१/२ टिस्पून वनिला इसेंस
१/२ कप प्यायचा सोडा (सोडा वॉटर)

कृती:
१) प्रेशर कूकरमधील रींग आणि शिट्टी काढून ठेवावी. आणि प्रेशर कूकर झाकण लावून मोठ्या आचेवर गरम करण्यास ठेवावा. साधारण ८ ते १० मिनीटे गरम करावा. कूकरमध्ये पाणी घालू नये. कोरडाच गरम करावा.
२) नंतर मैदा, बेकिंग सोडा, आणि बेकिंग पावडर एकत्र करून चाळून घ्यावे. जर बेकिंग पावडरचे लहान गोळे असतील तर ते मोडून घ्यावे. केकटीनला आतून बटरचे कोटींग करावे.
३) एका खोलगट मध्यम बाऊलमध्ये मऊ झालेले बटर आणि कंडेन्स मिल्क एकत्र करावे. हॅंड मिक्सरने व्यवस्थित फेटून घ्यावे. बॅटर एकजिव झाले कि त्यात एकूण मैद्यापैकी १/२ भाग मैदा आणि १/२ भाग सोडा वॉटर घालून हॅंड मिक्सरने फेटून घ्यावे. पिठाच्या गुठळ्या राहू देवू नयेत.
४) नंतर उरलेला मैदा आणि सोडा वॉटर, तसेच वनिला इसेंस घालून परत फेटावे. अजून एक महत्त्वाची गोष्ट म्हणजे उगाचच मिश्रण फेटत राहू नये. गरजेपुरतेच बॅटर एकदम स्मूथ होईस्तोवर फेटावे. खुप जास्त फेटल्याने केक मध्यभागी सिंक होतो.
५) तयार बॅटर केक टीनमध्ये ओतावे. अतिरीक्त हवेचे बुडबूडे निघून जाण्यासाठी, केक टीन ओट्यावर हलकेच ठोकावा (३-४ वेळा). कूकरची आच मध्यम करावी. गरम कूकरचे झाकण उघडून त्यात पकडीच्या सहाय्याने केकटीन ठेवावा. झाकण लावावे आणि ३५ ते ४० मिनीटे केक बेक करावा. २५ मिनीटे होईस्तोवर कूकर अजिबात उघडू नये. बेकिग करताना मधेमधे झाकण उघडल्यास कूकरच्या आतील तापमान कमी होते व पदार्थ हवा तसा बेक होत नाही.
६) साधारण २५ मिनीटांनी कूकरचे झाकण उघडावे. आता केक फुललेला दिसेल पण आतून शिजला नसावा. तरीही मध्यभागी टूथपिकने टोचून पाहावे, जर ओलसर बॅटर लागले असेल तर अजून १०-१२ मिनीटे केक बेक होवू द्यावा.
७) १०-१२ मिनीटांनी टूथेपिकने मध्यभागी टोचून पाहावे. जर टूथपिकला ओलसर बॅटर लागले नसेल आणि टूथपिक क्लिन बाहेर आली तर केक बेक झाला असे समजावे. केकटीन पकडीच्या सहाय्याने बाहेर काढावा.
५ मिनीटांनी डब्याच्या बाहेर काढून जाळीवर काढून ठेवावा. गार झाला कि सुरीने कापून सर्व्ह करावा.

टीपा:
१) कंडेन्स मिल्क आवडीनुसार वाढवावे. वरील प्रमाणात बेताचा गोड होतो. काहीजणांना कमीगोड लागू शकतो, म्हणून बॅटर तयार झाले कि त्याची चव पाहावी, लागल्यास थोडे कंडेन्स मिल्क वाढवावे.
२) कूकरची रींग आणि शिट्टी काढायला विसरू नये. तसेच कूकरमध्ये पाणी घालू नये.
३) केकटीन जाड हिंडालियमचा असावा. पातळ मेटल घेऊ नये. उष्णतेमुळे भांड्याला तडा जाऊ शकते.
४) जर दोन कलरमध्ये केक बनवयाचा असेल तर केक बॅटरचे २ भाग करावे. एक भाग तसाच ठेवावा, दुसर्‍या भागात २ ते ३ टेस्पून डार्क कोको पावडर आणि थोडे कंडेन्स मिक्स घालावे. आधी पांढरा तसाच ठेवलेला भाग केकटीनमध्ये ओतावा. त्यावर कोको घातलेले बॅटर घालावे.आणि बेक करावे.
५) केकटीन कूकरमध्ये निट राहतो आहे कि नाही ते आधी तपासून पाहावे. नाहीतर कूकर लहान असल्यास काही करता येणार नाही.
६) केकचे बॅटर केकटीनमध्ये अर्ध्यापेक्षा किंचीत जास्त भरावे. भांडे पूर्ण भरू नये त्यामुळे केक फुलल्यावर भांड्याच्या बाहेर येतो.

बेसिक एगलेस केक - Eggless sponge cake

Eggless Vanilla Cake in English

पूर्वतयारी - २५ ते ३० मिनीटे । बेकिंगसाठी - ३५ ते ४० मिनीटे
नग: १० लहान तुकडे

साहित्य:
३/४ कप मैदा (१०० ग्राम)
२०० ग्राम कंडेन्स मिल्क (१/२ कप + २ ते ४ चमचे)
१/४ कप बटर (मिठविरहित) (६० ग्राम)
१/२ टिस्पून बेकिंग पावडर
१/२ टिस्पून बेकिंग सोडा
१/२ टिस्पून वनिला इसेंस
१/२ कप प्यायचा सोडा (सोडा वॉटर) (१२० मिली)

ओव्हन नसल्यास प्रेशर कुकरमध्येही केक बनवता येईल. रेसिपीसाठी इथे क्लिक करा.

कृती:
१) प्रथम ओव्हन ३५० F (१८० C) ला प्रिहिट करत ठेवावे. तसेच केक टीनला (बेक करण्यासाठीचा डबा) आतून बटरचा हात लावून तयार ठेवावा.
२) नंतर मैदा, बेकिंग सोडा, आणि बेकिंग पावडर एकत्र करून चाळून घ्यावे. जर बेकिंग पावडरचे लहान गोळे असतील तर ते मोडून घ्यावे.
३) एका खोलगट मध्यम बाऊलमध्ये मऊ झालेले बटर आणि कंडेन्स मिल्क एकत्र करावे. हॅंड मिक्सरने व्यवस्थित फेटून घ्यावे. मिश्रण एकजिव झाले कि त्यात एकूण मैद्यापैकी १/२ भाग मैदा आणि १/२ भाग सोडा वॉटर घालून हॅंड मिक्सरने फेटून घ्यावे. पिठाच्या गुठळ्या राहू देवू नयेत.
४) नंतर उरलेला मैदा आणि सोडा वॉटर, तसेच वनिला इसेंस घालून परत फेटावे. अजून एक महत्त्वाची गोष्ट म्हणजे उगाचच मिश्रण फेटत राहू नये. गरजेनुसार मिश्रण एकदम स्मूथ होईस्तोवर फेटावे.
५) तयार मिश्रण केक टीनमध्ये ओतावे. अतिरीक्त हवेचे बुडबूडे निघून जाण्यासाठी, केक टीन ओट्यावर हलकेच ठोकावा (३-४ वेळा). केक टीन ओव्हनमध्ये मधल्या रॅकवर ठेवावा आणि ३५ ते ४० मिनीटे केक बेक करावा. ३५ मिनीटे होईस्तोवर ओव्हन अजिबात उघडू नये. ओव्हन बेकिग करताना मधेमधे उघडल्यास ओव्हनचे तापमान कमी होते व पदार्थ हवा तसा बेक होत नाही.
६) साधारण ३५ ते ३७ मिनीटांनंतर केकच्या मध्यभागी टूथपिकने किंवा सुरीने खालपर्यंत टोचून तशीच टूथपिक बाहेर काढावी. जर टूथपिकला ओलसट मिश्रण चिकटले नसेल तर केक बेक झाला असे समजावे. जर टूथपिकला ओलसट मिश्रण लागलेले असेल तर अजून थोडावेळ केक बेक करावा.
एकदा का केक बेक झाला कि ५ मिनीटांनी डब्याच्या बाहेर काढून जाळीवर काढून ठेवावा. गार झाला कि सुरीने कापून सर्व्ह करावा.



टीप:
१) केक टीनचे बरेच आकार मार्केटमध्ये उपलब्ध असतात, जसे की बदाम, गोल, अंडाकृती, चौकोन इत्यादी. तसे केकटीन वापरून विविध आकारात आपण केक बनवू शकतो.
२) वरील प्रमाणातून २ ते ३ जणांसाठी केक बनवता येईल. जर जास्त प्रमाणात केक बनवायचा असेल तर दुप्पट किंवा तिप्पट प्रमाण घेऊन केक बनवावा.
३) वरील प्रमाणासाठी लहान केकटीन वापरावा. मी ८" लांब x ३" रूद असा केकटीन वापरला होता. मिश्रण टीनमध्ये ओतल्यावर, तळापासून दिड ते २ इंच उंचीपर्यंत टीन भरला होता. वरील प्रमाणासाठी लहान केकटीन वापरावा. जर तुमच्याकडे मोठा केकटीन असेल तर मिश्रण दुप्पट घ्या.
४) प्लेन सोडा वॉटरच वापरावे. सोडा वॉटरमुळे केक हलका होतो. कोक, पेप्सी, जिंजर एल, लेमन सोडा वापरू नये. यामुळे केकच्या चवीत फरक पडेल.
५) सर्व साहित्य एकत्र करून झाल्यावर मिश्रणाची चव पाहावी. जर मिश्रण अगोड वाटले तर काही चमचे कंडेन्स मिल्क घालून मिक्स करावे आणि मगच बेक करावे.