आवळ्याचे सरबत - Avalyache sarbat

Amla Sharbat in English

वेळ: १५ ते २० मिनिटे
वाढणी: ८ ते १० जणांसाठी

साहित्य:
७ ते ८ आवळे
१ टीस्पून किसलेले आले
साखर
२ टीस्पून लिंबाचा रस

कृती:
१) आवळे कुकरमध्ये वाफवून घ्यावे. बिया काढून फक्त गर घ्यावा.
२) गराच्या दीडपट साखर घ्यावी. (गोड जास्त आवडत असल्यास साखर थोडी जास्त घेतली तरी चालेल)
३) साखर, आवळ्याचा गर, आले आणि लिंबाचा रस एकत्र करून घट्टसर पल्प बनवा.
हा पल्प प्लास्टिक किंवा काचेच्या बरणीत भरून फ्रीजमध्ये ठेवावा.
सरबत बनवताना २ ते ३ टेस्पून पल्प घेउन त्यात २ चिमटी मीठ घालावे. आणि ग्लासभर पाणी घालावे.

टीपा:
१) आवळ्याचे बारीक कण नको असल्यास पल्प चाळणीत गाळून घेतला तरी चालेल.
२) पल्प कोरड्या बरणीत भरावा. तसेच पल्प काढण्यासाठी चमचा वापराल तोही कोरडा असावा.
३) हा पल्प फ्रीजरमध्येही स्टोअर करता येतो. बर्फाच्या ट्रेमध्ये पल्प भरून फ्रीझ करावे. पल्प गोठला कि ट्रेमधून काढून हे क्युब्ज प्लास्टिक झिपलॉक पिशवीत ठेवावे. आणि परत फ्रीजरमध्ये ठेवावे. जेव्हा लागेल तेव्हा एक-दोन क्यूब्ज वापरून सरबत बनवता येईल. (जर वीजकपातीचा प्रॉब्लेम असेल तर ही पद्धत अवलंबू नकात. फ्रीजमध्येच बरणीत भरून ठेवा. कारण पल्प गोठून वितळला आणि परत गोठला कि त्याची चव उतरते.)
४) आवडत असल्यास सरबतात थोडेसे काळे मीठ घालावे. छान स्वाद येतो.

कलिंगडाचा ज्यूस - Watermelon Juice

Watermelon Juice in English

वेळ: ५ ते ७ मिनिटे
वाढणी: ३ जणांसाठी

साहित्य:
३ कप कलिंगडाच्या मध्यम फोडी, बिया काढून
१/२ कप संत्र्याचा ज्यूस (आवडीप्रमाणे कमी जास्त करावा)
१/४ टीस्पून काळं मीठ
१/२ टिस्पून आलं, बारीक चिरून
बर्फाचे तुकडे (ऐच्छिक)

कृती:
१) ब्लेंडरमध्ये कलिंगड, संत्र्याचा ज्यूस, काळं मीठ, आणि आलं घालून ब्लेंड करावे. एकजीव झाले कि सर्व्हिंग ग्लासमध्ये बर्फाचे तुकडे घालून त्यावर ज्यूस ओतावा. आणि गारच सर्व्ह करावे

टीप:
१) ज्यूसमध्ये कलिंगडाचे बारीक तुकडे सर्व्ह करतेवेळी वरून पेरू शकतो.

खरबूजाचा ज्युस - Cantaloupe Juice

Musk Melon (Kharbuja) Juice in English

A refreshing summer Drink - Musk Melon Juice

वेळ: १० मिनीटे
२ जणांसाठी
साहित्य:
२ ते अडीच कप खरबुजाच्या मध्यम फोडी (टीप)
१/२ कप संत्र्याचा ज्युस
१/२ टिस्पून लिंबाचा रस
१/२ टिस्पून किसलेले आले
किंचीत काळं मिठ
चवीपुरती साखर (ऐच्छिक)

कृती:
१) खरबुजाच्या फोडी, संत्र्याचा रस, लिंबू रस, आलं आणि थोडं काळं मिठ एकत्र करून मिक्सरमध्ये बारीक वाटून घ्यावे.
२) मोठ्या गाळण्याने किंवा स्वच्छ सुती कपड्याने व्यवस्थित गाळून घ्यावे. गाळण्यामध्ये जो चोथा उरला असेल तो दाब देऊन निट पिळून घ्यावा.
३) तयार ज्युसची चव पाहावी. शक्यतो साखर घालू नये, पण लागल्यास १ ते २ चमचे घालावी.
ज्युस फ्रिजमध्ये गार करावा किंवा लगेच प्यायचा असल्यास बर्फाचे २-३ तुकडे घालून सर्व्ह करावा.

टीपा:
१) मी रेडीमेड संत्र्याचा ज्युस वापरला होता, त्यामुळे साखर घालावी लागली नाही. पण जर तुम्ही घरीच संत्र्याचा रस काढणार असाल तर चांगली रसदार संत्री वापरावी तसेच थोडी साखर घालावी.
२) खरबुज व्यवस्थित पिकलेले व गोड असावे म्हणजे चव छान लागेल. खरबुज कापताना आधी दोन भाग करावे, बिया काढून टाकाव्यात, सालं काढावीत आणि गराच्या फोडी कराव्यात.
३) जर घरी ज्युसर असेल तर तो वापरून छान ज्युस होईल.
४) आवडत असल्यास फ्रेश हर्ब्स जसे पुदीना, बेसिल वगैरेची २-४ पाने चुरडून घालू शकतो.

मँगो लस्सी - Mango Lassi

Mango Lassi in English

२ जणांसाठी
वेळ: १० मिनीटे

साहित्य:
३/४ कप दुध
१ कप दही
३/४ कप आंब्याचा रस (मी कॅनमधील रेडीमेड मँगो पल्प वापरला होता)
४ टेस्पून साखर
१/४ टिस्पून वेलचीपूड (ऐच्छिक)
सजावटीसाठी बदाम पिस्त्याचा भरडसर चुरा

कृती:
१) दुध, दही, मँगो पल्प, साखर आणि वेलचीपूड एकत्र मिक्सरमध्ये व्यवस्थित ब्लेंड करून घ्यावी.
२ सर्व्हींग ग्लासेसमध्ये लस्सी ओतावी. वरून पिस्ता बदामची पूड घालून सजवावे. फ्रिजमध्ये गार करावी आणि मग सर्व्ह करावी.

टीपा:
१) रेडीमेड मँगो पल्पमध्ये बर्‍यापैकी साखर असते. म्हणून ४ टेस्पून साखर वापरली आहे. घरी आमरस बनवून तोही लस्सी साठी वापरता येतो. भरपूर गर असलेले २ हापूस आंबे घ्यावे. साल आणि आतील कोय काढावी. गर मिक्सरमध्ये बारीक वाटावा. जर गरामध्ये आंब्यातील तंतू असतील तर रस गाळून घ्यावा. आणि वरील कृतीप्रमाणे लस्सी बनवावी. आमरस घरी बनवल्याने लस्सीमध्ये साखर अजून घालावी लागेल.
२) शक्यतो पूर्ण स्निग्धांश (Full Fat) असलेले दही वापरावे. घरी विरजले असल्यास उत्तम. ग्रोसरी स्टोअर्समध्ये जे low fat किंवा Fat Free दही मिळते त्याचे टेक्स्चर कधीकधी गुळगुळीत असते त्यामुळे लस्सी चांगली लागत नाही.
३) लस्सीचा पातळ-घट्टपणा आवडीनुसार ठेवावा. त्याप्रमाणे दुधाचे प्रमाण कमी किंवा जास्त करावे.

लिंबाचे टिकाऊ सरबत - Limbu sarbat

Lemon Juice in English


वेळ: साधारण २५ मिनीटे
साधारण ३ कप लिंबाचे टिकाऊ सरबत (यातून साधारण २०-२२ जणांना लिंबाचे सरबत बनू शकेल)


साहित्य:
१ कप लिंबाचा रस (साधारण १२ मोठी रसाची लिंबं)
अडीच कप साखर
३/४ कप पाणी
२ टिस्पून मिठ

कृती:
१) लिंबाचा रस गाळून घ्यावा म्हणजे बिया आणि लिंबाचा किंचीत राहिलेला गर निघून फक्त लिंबाचा रस उरेल.
२) अडीच कप साखर आणि ३/४ कप पाणी एका पातेल्यात एकत्र करावे. गोळीबंद पाक करावा (महत्त्वाची टिप).
३) पाक तयार झाला कि गॅस बंद करावा. तयार पाकात लिंबाचा रस घालून ५ मिनीटे ढवळावे. नंतर जरा निवेस्तोवर अधूनमधून ढवळावे.
४) तयार लिंबू सरबत काचेच्या बाटलीत भरून फ्रिजमध्ये ठेवावा.
लिंबाचे सरबत करताना १ ग्लासभर लिंबाचे सरबत बनवायचे असल्यास, एका ग्लासमध्ये २ मोठे चमचे लिंबाचा पाक घालावा, गार पाणी घालावे आणि मिक्स करावे. मिठाची गरज लागल्यास किंचीत मिठ घालावे. तसेच बर्फही घालू शकतो.

टीप:
१) लिंबाच्या सरबतात चिमूटभर वेलचीपूड घातली तरी छान फ्लेवर येतो.
२) गोळीबंद पाक म्हणजे पाकाचा थेंब गार पाण्यात टाकल्यावर टणक गोळी तयार झाला पाहिजे. पण लिंबू सरबताला मऊसर गोळी (Soft Ball Consistency) तयार झाली तरीही चालेल.

Labels:
Lemon Juice, Homemade Lemonade, limbu sarbat

बिटाचा ज्युस - Beet Root Juice

Beet Root Juice in English

वेळ: १५ मिनीटे
वाढणी: २ ग्लास

साहित्य:
१ बीट, मध्यम
१ टोमॅटो, मध्यम
१ गाजर, मध्यम
१/३ कप पाणी
१/४ टिस्पून जिरेपूड
मिठ साखर चवीनुसार
१ टिस्पून लिंबाचा रस (ऐच्छिक)

कृती:
१) बिट आणि गाजर प्रेशर कूकरमध्ये १ शिट्टी होईपर्यंत शिजवावे (टीप १). नंतर गाजर आणि बीटाचे मध्यम आकाराचे तुकडे करावेत. टोमॅटोसुद्धा मध्यम चिरून घ्यावा.
२) बिट, गाजर आणि टोमॅटो मिक्सरमध्ये बारीक वाटून घ्यावे. अगदी गरज वाटली तरच थोडेसे पाणी घालावे.
३) स्वच्छ कापडातून बिट-गाजर-टोमॅटोचे वाटण घट्ट पिळून गाळून घ्यावे.
४) या ज्युसमध्ये जिरेपूड आणि मिठ घालून मिक्स करावे. यामध्ये साखर आणि लिंबाचा रस घालावा (टीप २).

टीप:
१) बीट आणि गाजर कच्चे वापरले तरीही चालेल.
२) ज्युसमध्ये कदाचित साखर घालावी लागणार नाही. बिटाचा गोडपणा पुरेसा होईल तसेच जर टोमॅटोची चव गरजेपुरती आंबट असेल तर लिंबाचा रसही वापरावी लागणार नाही.