आटीव आंब्याचा रस - Thickened Mango Pulp

Mango Mawa in English

साहित्य:
४ कप हापूस आंब्याचा रस (कॅनमधील साखर असलेला रस वापरू नये)
१ कप साखर

कृती:
१) आंब्याचा रस बारीक चाळणीतून गाळून घ्यावा. म्हणजे रसात जर दोरे आणि गुठळ्या असतील तर त्या निघून जातील.
२) नॉनस्टिक पॅनमध्ये आंब्याचा रस आटवत ठेवावा. सतत ढवळावे. तळाला रस करपू नये म्हणून काळजी घ्यावी.
३) रस एकदम सुखा झाला कि साखर घालावी. आच कमी करून दोनेक मिनिटे ढवळावे. गॅस बंद करावा.
रस कोमट झाला कि जाड प्लास्टिकच्या डब्यात ठेवावा. गार झाला कि झाकण लावून टाकावे. असा आटीव रस फ्रीजरमध्ये आठ-दहा महिने सहज टिकतो.

टीप:
१) फ्रेश आंब्याचा रस वापरावा.
२) आटीव रसात साखर घातली असल्याने ज्या पदार्थात तो वापरणार असाल त्यात साखर घालायची जरूर नाही. किंवा लागल्यास अगदी थोडीच घालावी.
३) साखर शेवटी घालावी. आणि त्यानंतर जास्तवेळ आचेवर ठेवू नये. यामुळे रस काळपट होतो.

आंबा मोदक - Amba Modak

Mango Modak in English

वेळ:३० मिनिटे
२५ ते ३० लहान मोदक

साहित्य:
१/२ कप हापूस आंब्याचा मावा (रेसिपीसाठी इथे क्लिक करा)
३/४ कप साखर
१/२ कप खवा
१ टीस्पून तूप

कृती:
१) साखर मिक्सरमध्ये बारीक करून पिठी साखर बनवावी. पिठीसाखर बारीक चाळणीतून चाळून घ्यावी. चाळणीत राहिलेली जाडसर साखर खलबत्त्यात कुटून बारीक करावी.
२) माय्क्रोबेव्हसेफ भांडे घ्यावे. त्यात तूप आणि आंब्याचा मावा घालावा. दीड मिनिट मायाक्रोबेव्ह करावे.भांडे बाहेर काढून ढवळावे. जरा निवळले कि परत १ मिनिट आणि नंतर ३० सेकंद असे मायक्रोवेव्ह करावे. मावा जळणार नाही याची काळजी घ्यावी.
३) भांडे बाहेर काढून ३० सेकंद ढवळा. आता खवा हाताने मोडून या माव्यात मिक्स करावा. ३०-३० सेकंद मायक्रोवेव्ह करावे. (प्रत्येक ३० सेकंदानी भांडे बाहेर काढून मिश्रण ढवळावे.)
४) मिश्रण पातळसर वाटत असेल तर अजून २० ते ३० सेकंद मायक्रोवेव्ह करावे. [मिश्रण बाहेर काढाल तेव्हा ते बुडबुडेयुक्त आणि थोडेसेच पातळ असेल. थोडावेळ चमच्याने ढवळले कि निवळून घट्टसर बनते.
५) मिश्रण घट्ट आणि चिकट बनेल. अगदी कोमट झाले कि साखर घालून मिक्स करा. साखर मात्र एकावेळी थोडीथोडीच घालावी. मिश्रण मायक्रोवेव्ह बाहेर काढल्या काढल्या साखर घालू नये. साखर वितळून मिश्रण एकदम पातळ होते.
६) मिश्रण घट्टसर झाले कि मोदकाच्या साच्यात मिश्रण भरून मोदक बनवावे.

टिप्स:
१) मिश्रण आळायला थोडा वेळ कमी किंवा जास्त लागू शकतो. आंब्याचा रस कितपत आटवला आहे त्यावरून वेळ कमीजास्त लागू शकतो.
२) जर मिश्रण चिकटसरच राहिले तर घट्टपणासाठी थोडी मिल्क पावडर घालू शकतो.
३) साखर घातल्यावर मिश्रण मायक्रोवेव्हमध्ये गरम करू नये.
४) साखर मिक्सरमध्ये बारीक केल्यावर बारीक चाळणीमधून चाळून घ्यावी. चाळणीत राहिलेली साखर परत बारीक करावी. जर पिठी साखर न चाळता घेतली तर साखरेचे बारीक बारीक कण मोदक खाताना दाताखाली येतात.
५) हे मोदक मायक्रोवेव्हमध्ये करायला सोप्पे आहेत. पण गॅसवर सुद्धा हे मोदक करता येतील. पॅनमध्ये खवा मोकळा करून मध्यम आचेवर भाजावा. त्यातील तूप बाहेर येईपर्यंत भाजला गेला पाहिजे. भाजलेला खवा दुसऱ्या भांड्यात काढून ठेवावा. कोमटसर झाला कि चाळलेली पिठीसाखर यात घालावी आणि मळावे. मिश्रण चिकट झाले तर दोन-तीन चमचे मिल्क पावडर घालावी. मोदकाच्या साच्यात घालून मोदक करावेत.
६) अमेरिकेत खवा बहुतांश इंडियन ग्रोसरी स्टोअर्समध्ये मिळू शकतो. (फ्रोझन सेक्शनमध्ये शोधा)
७) जर फ्रोझन खवा वापरणार असाल तर लागेल तेवढा खवा २ तास फ्रीज बाहेर काढून ठेवा आणि रूम टेम्परेचरला येउ द्या.
८) जर आंब्याचा मावा उपलब्ध नसेल तर कॅनमधील आंब्याचा रस वापरू शकतो. फक्त हा रस मायक्रोवेव्हमध्ये जास्तवेळ आटवावा लागेल. तसेच या रसात साखर असते, आटवल्यावर रसाचा रंग थोडासा बदलू शकतो.

मोरंबा - Moramba (पिकलेल्या आंब्याचा)

Moramba in English 

वेळ: २५ ते ३० मिनिटे

साहित्य:
२ कप हापूस आंब्याचे लहान पिसेस (टीप १ आणि २)
४ कप साखर
५ ते ६ लवंगा

कृती:
१) मध्यम आकाराचे नॉनस्टीक पातेले घ्यावे. त्यात आंब्याचे तुकडे आणि साखर एकत्र करून मध्यम आचेवर गरम करत ठेवावे.
२) आंब्याचे तुकडे, लवंगा आणि साखर उकळवावे. साखर वितळली कि गरजेपुरती कंसीस्टंसी येईस्तोवर आटवावे. खूप जास्तही आटवू नये कारण थंड झाल्यावर मोरंबा अजून घट्ट होतो.
तयार मोरंबा काचेच्या बरणीत भरून ठेवावा.

टीपा: 
१) खूप जास्त पिकलेला आंबा वापरू नये. जास्त पिकलेला आंबा शिजताना विरघळतो, फोडी अख्ख्या राहत नाहीत.
२) आंबा सोलून २ सेमी तुकडे करावे. आतील बाठ काढून टाकावी.
३) लवंगेऐवजी वेलचीही घालू शकतो.
४) कंसीस्टंसी पातळ ठेवली तरी चालेल, फक्त मोरंबा फ्रीजमध्ये ठेवावा.

आंबोशीचे लोणचे - Amboshiche lonche

Amboshiche lonche in English 

वेळ: २५ मिनिटे
साधारण  दीड कप लोणचे

साहित्य:
३/४ कप आंबोशी (सुकलेल्या कैरीच्या फोडी) (घरी बनवण्यासाठी स्टेप १ पाहा)
दोन कप गूळ
१/४ कप लाल मोहोरीची पावडर
१ टिस्पून तळलेली मेथीची पावडर (मेथी दाणे तळून कुटून घ्यावे)
१/४ कप मिठ किंवा चवीनुसार
१/२ टिस्पून मोहोरी
१ टिस्पून हळद
१ टिस्पून हिंग
१/४ कप तेल

कृती:
१) कैरीची साल काढून पांढर्‍या भागाच्या फोडी कराव्या. जरासे मिठ लावून ७ ते ८ दिवस उन्हात खडखडीत वाळवाव्यात.
२) २ वाट्या पाणी उकळवून गॅस बंद करावा. सुकलेल्या फोडी रात्री या गरम पाण्यात घालाव्यात. आणि झाकून ठेवावे. सकाळी पाणी काढून टाकावे. फोडींना मिठ चोळून घ्यावे.
३) एका भांड्यात मोहोरी पावडर आणि १/४ कप पाणी मिक्सरमध्ये घालून पांढरट होईस्तोवर फेसावे. किंवा मिक्सरमध्ये घालून फेसावे. फक्त पाणी हळूहळू घालावे.
४) तेलात मोहोरी, हिंग, हळद घालून फोडणी करावी. फोडणी गार होवू द्यावी.
५) गूळामध्ये थोडे पाणी घालून गॅसवर ठेवावे. गूळ पातळ झाला कि गॅस बंद करावा.
६) फेसलेली मोहोरी पावडर, मेथी पावडर, कोमट झालेला गूळाचा पाक आणि गार झालेली फोडणी फोडीमध्ये घालून मिक्स करावे.
तयार लोणचे लगेच खाता येईल. पण ८ दिवसांनी मुरल्यावर अजून छान लागते.

कैरीचे लोणचे - Kairiche Lonche

Mango Pickle in English

वेळ: १५ मिनीटे
साधारण २ कप लोणचे

साहित्य:
२ कप कैरीच्या लहान फोडी (३ लहान कैर्‍या)
दिड टिस्पून मिठ
१/२ टिस्पून हिंग
१/४ ते १/२ टिस्पून तळलेल्या मेथी दाण्याची पावडर (स्टेप २)
१ टेस्पून मोहोरी पावडर
२ टेस्पून लाल तिखट
फोडणीसाठी: ४ टेस्पून तेल, १/२ टिस्पून मोहोरी, १/२ टिस्पून हळद, १/४ टिस्पून हिंग

कृती:
१) कैर्‍या धुवून निट कोरड्या करून मगच त्याच्या फोडी कराव्यात. कैरीच्या फोडींना तासभर मिठ, लाल तिखट आणि हिंग लावून ठेवावे.
२) १२-१५ मेथी दाणे तेलात तळून घ्यावे. खलबत्त्यात कुटून बारीक पूड करावी.
३) कढल्यात तेल गरम करून त्यात मोहोरी, हिंग, आणि हळद घालून फोडणी करावी. हि फोडणी एखाद्या काचेच्या किंवा स्टीलच्या वाटीत काढून गार होवू द्यावी.
४) कैरीच्या फोडींमध्ये मेथीपूड, मोहोरी पूड आणि गार झालेली फोडणी घालून मिक्स करावे.
हे लोणचे लहान काचेच्या बरणीत भरून ठेवावे.

टीपा:
१) जर खार जास्त हवा असेल तर थोडी मोहोरी पावडर घालावी.
२) मेथीची पावडर आधी १/४ टिस्पूनच टाकावी. २-३ तासांनी चव पाहून जर लागली तर अजून थोडी घालावी.
३) मिठाचे प्रमाणही आवडीनुसार कमी किंवा जास्त करता येईल.
४) मी २ टेस्पून लाल तिखटापैकी १/२ टेस्पून तिखट हे रंगाचे (काश्मिरी) लाल तिखट वापरले होते व उरलेले दिड टेस्पून साधं तिखट वापरलं होतं.
५) वरील लोणच्यात मोहोरी पावडर बरोबर थोडी मोहोरीची डाळ वापरल्यास लोणचे दिसायला आणि चवीलाही छान होते.

मँगो आइसक्रीम - Mango Ice cream

Mango Icecream in English

A delicious Homemade Mango Ice-cream.

वेळ: ३० ते ३५ मिनीटे
८ जणांसाठी

साहित्य:
१ कप हेवी व्हिपींग क्रिम, थंडगार
२ कप आंब्याचा रस, थंडगार (मी रेडीमेड कॅन मधील साखर असलेला आंबा रस वापरला होता)
१/२ कप पिठी साखर
वेलचीपूड (ऐच्छिक)

कृती:
१) एक मध्यम आकाराचे खोलगट काचेचे बोल घ्या आणि १/२ तास फ्रिजमध्ये गार करण्यास ठेवा.
२) गार झालेले काचेचे बोल घेऊन त्यात गार व्हिपींग क्रिम घाला आणि हॅण्ड मिक्सरने जास्त स्पिडवर फेटा.
३) क्रिम थोडे फ्लफी व्हायला लागले कि २ ते ३ बॅचमध्ये साखर घालून फेटत राहा. क्रिम व्यवस्थित फ्लफी झाले कि फेटणे थांबवावे. गरजेपेक्षा जास्त फेटल्याने क्रिम पिवळसर होवून त्यातील स्निग्धांश (fat content) विलग होतो.
४) यामध्ये आता थंड आंब्याचा रस घालून लाकडी कालथ्याने फोल्ड करा. वेलचीपूड घालणार असल्यास आता घाला. किंवा त्याऐवजी तुम्हाला मँगो एसेन्स घालायचा असल्यास २ -३ थेंब घाला. निट मिक्स करा.
५) जर तुमच्याकडे आइसक्रिम मशिन असेल तर त्यात हे मिश्रण घालून घोटवा.
६) जर आईसक्रिम मशिन नसेल तर हे मिश्रण फ्रिझर सेफ प्लास्टिक किंवा फ्रिझर सेफ मेटलच्या भांड्यात घाला (बेकिंगसाठी जे मेटलचे भांडे वापरतात तेही चालेल). साधारण २ तास हे मिश्रण फ्रिजमध्ये ठेवा. नंतर फ्रिजरमधून काढा. आईसक्रिम भांड्याच्या कडेने सुटेस्तोवर थांबा. नंतर हे गोठलेले मिश्रण मिक्सरमध्ये काही मिनीटे ब्लेंड करा. परत भांड्यात ओतून १-२ तास फ्रिजमध्ये ठेवा. २ तासांनी परत मिक्सरमध्ये फिरवा. असे किमान ३ ते ४ वेळा करा म्हणजे आईसक्रिम स्मूथ लागेल.

टीपा:
१) रेडीमेड आमरसाऐवजी घरी बनवलेला हापूस आंब्याचा रसही वापरता येईल. फक्त आमरस चाळणीतून गाळून घ्यावा म्हणजे गुठळ्या किंवा आंब्यातील धागे निघून जातील. तसेच घरगुती आमरस वापरल्यास जास्त साखरही घालावी लागेल तेव्हा चव पाहून साखर घालावी.
२) भाजलेला खवाही आईसक्रिममध्ये वापरू शकतो. वरील प्रमाणासाठी १/२ ते १ कप खवा वापरावा.
३) बारीक चिरलेले बदाम पिस्ताही घालू शकतो.
४) ३-४ वेळा मिक्सरमध्ये मिश्रण ब्लेंड केल्याव शेवटी जेव्हा आईसक्रिम सेट करण्यास ठेवाल त्यावेळी आंब्याचे साल काढून बारीक तुकडे मिश्रणात घालू शकता, छान लागतात.

मँगो लस्सी - Mango Lassi

Mango Lassi in English

२ जणांसाठी
वेळ: १० मिनीटे

साहित्य:
३/४ कप दुध
१ कप दही
३/४ कप आंब्याचा रस (मी कॅनमधील रेडीमेड मँगो पल्प वापरला होता)
४ टेस्पून साखर
१/४ टिस्पून वेलचीपूड (ऐच्छिक)
सजावटीसाठी बदाम पिस्त्याचा भरडसर चुरा

कृती:
१) दुध, दही, मँगो पल्प, साखर आणि वेलचीपूड एकत्र मिक्सरमध्ये व्यवस्थित ब्लेंड करून घ्यावी.
२ सर्व्हींग ग्लासेसमध्ये लस्सी ओतावी. वरून पिस्ता बदामची पूड घालून सजवावे. फ्रिजमध्ये गार करावी आणि मग सर्व्ह करावी.

टीपा:
१) रेडीमेड मँगो पल्पमध्ये बर्‍यापैकी साखर असते. म्हणून ४ टेस्पून साखर वापरली आहे. घरी आमरस बनवून तोही लस्सी साठी वापरता येतो. भरपूर गर असलेले २ हापूस आंबे घ्यावे. साल आणि आतील कोय काढावी. गर मिक्सरमध्ये बारीक वाटावा. जर गरामध्ये आंब्यातील तंतू असतील तर रस गाळून घ्यावा. आणि वरील कृतीप्रमाणे लस्सी बनवावी. आमरस घरी बनवल्याने लस्सीमध्ये साखर अजून घालावी लागेल.
२) शक्यतो पूर्ण स्निग्धांश (Full Fat) असलेले दही वापरावे. घरी विरजले असल्यास उत्तम. ग्रोसरी स्टोअर्समध्ये जे low fat किंवा Fat Free दही मिळते त्याचे टेक्स्चर कधीकधी गुळगुळीत असते त्यामुळे लस्सी चांगली लागत नाही.
३) लस्सीचा पातळ-घट्टपणा आवडीनुसार ठेवावा. त्याप्रमाणे दुधाचे प्रमाण कमी किंवा जास्त करावे.

आम्रखंड - Amrakhand

!! अक्षय तृतीयेच्या हार्दिक शुभेच्छा !!

Amrakhand in English
वेळ: ३० मिनीटे
५ ते ६ जणांसाठी

साहित्य:
३२ OZ चोबानी प्लेन ग्रिक योगर्ट किंवा १/२ किलो चक्का
३/४ ते १ कप आंब्याचा रस (मी कॅनमधील मँगो पल्प वापरला होता)
१ कप साखर
१/२ टिस्पून वेलची पावडर
२ टेस्पून चारोळी
२ टेस्पून पिस्ता, जाडसर पूड करावी किंवा पातळ काप करावे

कृती:
१) ग्रिक योगर्ट सुती कपड्यात बांधून ८ ते १० तास त्यातील पाण्याचा अंश जाईस्तोवर लटकवून ठेवा. खाली एखादे पसरट भांडे ठेवा म्हणजे गळलेले पाणी त्यात जमा होईल.
२) तयार चक्का मोठ्या मिक्सिंग बोलमध्ये घ्यावा. त्यात १/२ कप आंब्याचा रस आणि १/२ कप साखर घाला. मिक्स करून १५ मिनीटे साखर विरघळण्यासाठी तसेच ठेवून द्या. परत चमच्याने घोटून चव पाहा. जर आंब्याचा फ्लेवर तसेच गोडपणा हवा असेल तर आवडीप्रमाणे आंब्याचा रस आणि साखर घाला. नंतर पूरणयंत्रातून हे मिश्रण फिरवून घ्या.
३) यात वेलचीपूड, चारोळी, पिस्ता घालून मिक्स करा. फ्रिजमध्ये थंड करण्यास ठेवा आणि पुर्‍यांबरोबर सर्व्ह करा.

टीपा:
१) चक्क्यामध्ये एकाचवेळी सर्व आंब्याचा रस आणि साखर घालू नये. साखर चक्क्यात विरघळली कि चक्का थोडा पातळ होतो. तसेच आंब्याच्या रसाचा पातळपणा आहेच. म्हणून बेताबेताने आंबारस आणि साखर घालून चव पाहावी. आणि गरजेनुसार जिन्नस वाढवावे.
२) घरी काढलेला हापूस आंब्याचा रस रेडीमेड आमरसाऐवजी वापरू शकतो. हा रस पाणी न घालता मिक्सरमध्ये बारीक करावा आणि गाळून घ्यावा. तसेच वरील प्रमाणापेक्षा जास्त साखर घालावी लागेल.
३) किंचीत भरड ठेवलेली साखर किंवा ग्रॅन्युलेटेड शुगर वापरल्यास कदाचित चक्का-साखर पूरणयंत्रातून बारीकही करावे लागणार नाही. फक्त एकदम बारीक पिठी साखर शक्यतो वापरू नये, श्रिखंडाचे टेक्श्चर बदलते.
४) वेलचीऐवजी जायफळ पूडसुद्धा वापरू शकतो.
५) पिस्त्याबरोबर बदाम काजू ही घातले तरी छान लागतात.

कैरीचे सार - Kairiche Saar

Raw Mango Soup in English

वाढणी: ४ जणांसाठी
वेळ: २० मिनीटे

साहित्य:
१ मोठी कैरी
गूळ (टीप)
१ टिस्पून तूप
१/४ टिस्पून जिरे
२ चिमूटभर हिंग
३ ते ४ कढीपत्ता पाने
२ हिरव्या मिरच्या, ठेचून घ्याव्यात
१/४ कप कोथिंबीर
चवीपुरते मिठ

कृती:
१) कैरी कूकरमध्ये २ शिट्ट्या करून वाफवून घ्यावी. कूकरची वाफ जिरल्यावर वाफवलेली कैरी बाहेर काढून कोमटसर असतानाच सोलून घ्यावी. नंतर आतील गर घट्ट असेल तर किसून घ्यावा.
२) जेवढा गर असेल तेवढा गूळ घालावा (किंचीत कमी चालेल). हे मिश्रण मिक्सरमध्ये बारीक करावे. कैरीच्या गराला दोरे असतील तर गर गाळून घ्यावा.
३) कढईत तूप, जिरे, हिंग, कढीपत्ता आणि मिरचीचा ठेचा घालून फोडणी करावी. त्यामध्ये कैरीचा गर घालून गरजेइतपत पाणी घालावे. मिठ घालून उकळी काढावी.
उकळी काढून झाल्यावर चिरलेली कोथिंबीर घालून गरमागरम सर्व्ह करावे.
हे कैरीचे सार गरमागरम तूप-भाताबरोबर छान लागते. तसेच नुसते प्यायलाही मस्तच!!

टीप:
१) कैरीला आंबटपणा कमी असेल तर गूळाचे प्रमाण कमी करावे.

Labels:
Green Mango Soup, Sweet and sour mango soup, Kairiche saar