तिखट मिठाच्या पुऱ्या - Tikhatmithachya Purya

Tikhatmitachya Purya in English

वेळ: ३० मिनिटे
वाढणी: २० ते २२ मध्यम आकाराच्या पुऱ्या

साहित्य:
१ कप गव्हाचे पीठ (कणिक)
२ टेस्पून तांदुळाचे पीठ
२ टेस्पून बेसन
२ टीस्पून गरम तेल
१ टीस्पून धनेपूड
१ टीस्पून जिरेपूड
१/२ टीस्पून लाल तिखट किंवा चवीनुसार
१/४ टीस्पून हळद
चवीपुरते मीठ
पुऱ्या तळायला तेल

कृती:
१) मध्यम आकाराच्या वाडग्यात कणिक, बेसन, आणि तांदुळाचे पीठ एकत्र करावे. त्यात मीठ, लाल तिखट, धने-जिरेपूड आणि हळद घालून मिक्स करावे.
२) या मिश्रणात २ टीस्पून गरम तेलाचे मोहन घालावे. पाणी घालून घट्ट पीठ मळावे. १५ मिनिटे झाकून ठेवावे.
३) कढईत मंद आचेवर तेल गरम करायला ठेवावे. मधल्या वेळेत पीठाचे छोटे गोळे करावेत. या गोळ्यांच्या लाटून पुऱ्या कराव्यात. आच मिडीयम आणि हाय यांच्या मध्यावर आणावी. पुऱ्या दोन्ही बाजू पालटवून तळून घ्यावात.
४) पुरी तळताना ती फुलावी म्हणून पुरीवर  झाऱ्याने काळजीपुर्वक तेल उडवावे. पुरी सोनेरी रंगावर तळून घ्यावी.
पुरी तयार झाल्यावर बाहेर काढून टिश्यू पेपरवर ठेवावी.
पुऱ्या गरम आणि गारही छान लागतात. २-३ दिवस टिकतात म्हणून प्रवासात न्यायलाही चांगला पर्याय आहे.

दही बुत्ती - Dahi Butti

Dahi Butti in English

वेळ: १५ मिनिटे
२ ते ३ जणांसाठी

साहित्य:
३/४ कप तांदूळ
३/४ ते १ कप दही
१/४ ते १/२ कप दुध
१ टीस्पून तूप, ३-४ कढीपत्ता पाने, २ सुक्या लाल मिरच्या, १/४ टीस्पून उडीद डाळ, २ चिमटी जिरे, २ चिमटी हिंग, १/४ टीस्पून आले
चवीपुरते मीठ

कृती:
१) तांदूळ धुवून त्यात दीड ते दोन कप पाणी घालून प्रेशर कुकरमध्ये भात शिजवून घ्यावा. मीठ घालू नये.
२) भात एका खोलगट वाडग्यात काढून घ्यावा. त्यात गार दुध घालावे. गार दुध घातल्याने भात लवकर थंड व्हायला मदत होते. मिश्रण गार झाले (अगदी किंचित कोमट असेल तरी चालेल) कि त्यात दही आणि मीठ घाला. गरम मिश्रणात दही घातल्यास उष्णतेमुळे दही फुटते.
३) कढल्यात तूप गरम करावे. त्यात आधी उडीद डाळ घालावी. गुलाबीसर झाली कि त्यात जिरे, हिंग, कढीपत्ता, मिरच्या घालून फोडणी करावी. मिरच्या जर तुपात भिजत नसतील तर चमच्याने थोडा दाब द्यावा. आता गॅस बंद करावा आणि फोडणीत आले घालावे. मिक्स करून हि फोडणी दही-भातावर घालावी.
मिक्स करून सर्व्ह करावे.

टीपा:
१) आदल्या दिवशीचा भात वापरला तरीही चालतो. फक्त या भाताला कुकरमध्ये एक वाफ काढावी, शिट्टी करू नये. फक्त ५ मिनिटे मध्यम आचेवर वाफ काढावी. आदल्या दिवशीच्या भाताची शिते थोडी तडतडीत होतात. अशा भाताची दही-बुत्ती चांगली लागत नाही.
२) या भातात थोडा गोडपणा देण्यासाठी १/२ टीस्पून साखर घालू शकतो.
३) दह्याचे प्रमाण आवडीप्रमाणे कमी-जास्त करू शकतो.