वेळ: ३५ ते ४० मिनिटे
८ ते १० मध्यम फलाफल
दीड कप भिजलेले काबुली चणे (छोले)
२ टीस्पून बेसन (टीप १)
३ मोठ्या लसूण पाकळ्या
१ टीस्पून धनेपूड
१/२ टीस्पून जिरेपूड
१/२ कप पार्सली
२ हिरव्या मिरच्या किंवा १/२ टीस्पून लाल तिखट
१ लिंबाचा रस
चवीपुरते मीठ
तळण्यासाठी तेल
लहान चिमटी खायचा सोडा
कृती:
१) भिजलेले काबुली चणे मिक्सरमध्ये घालावेत, पाणी घालू नये. त्यात लसूण, पार्सली, हिरवी मिरची, मीठ आणि लिंबाचा रस घालावा. भरडसर वाटून घ्यावे. वाटलेले मिश्रण एका वाडग्यात काढावे. त्यात बेसन, खायचा सोडा आणि धने-जिरेपूड घालावी आणि मिक्स करावे. चव पाहून गरज वाटल्यास तिखट मीठ घालावे.
२) कढईत तेल गरम करावे. तेल गरम झाले कि आच मध्यम करावी.
३) साधारण दीड टेस्पून मिश्रण घेउन त्याचा घट्ट गोळा बांधावा. हा गोळा गरम तेलात घालावा. गोल्डन ब्राउन होईस्तोवर तळावा.
अशाप्रकारे सर्व फलाफल तळून घ्यावे. जनरली, फलाफल काकडीच्या सॉसबरोबर सर्व्ह करतात.
टीपा:
१) शक्यतो बेसन न घालता फक्त भिजलेल्या काबुली चण्याचे फलाफल करून पहावे. एक लहान गोळा गरम तेलात घालून पाहावा. जर गोळा तेलात फुटत असेल तरच बेसन घालावे.
२) फलाफल मध्यम आचेवरच तळावेत. मोठ्या आचेवर तळल्यास बाहेरून रंग लगेच येईल पण आतून कच्चे राहतील. तसेच मंद आचेवर तळल्यास फलाफल तेलात फुटू शकतात.
0 comments:
Post a Comment