Masoor Amti in English
वेळ: १५ ते २० मिनिटे
वाढणी: ४ जणांसाठी
साहित्य:
१/२ कप मसूर (टीप १)
फोडणीसाठी: १ टेस्पून तेल, २ चिमटी मोहोरी, २ चिमटी जिरे, १/८ टीस्पून हिंग, १/४ टीस्पून हळद, १/२ टीस्पून लाल तिखट, ५ ते ६ कढीपत्ता पाने
४ ते ५ लसणीच्या मोठ्या पाकळ्या, जाडसर चिरून
२ टेस्पून ओला नारळ
१ टीस्पून गोड मसाला
३ कोकमचे तुकडे
२ टीस्पून गूळ किंवा चवीनुसार
१/४ कप बारीक चिरलेली कोथिंबीर
कृती:
१) मसूर रात्रभर पाण्यात भिजत ठेवावे. नंतर पाणी काढून टाकावे. १/४ चमचा मीठ घालून प्रेशर कुकरमध्ये २ शिट्ट्या करून, पाणी न घालता शिजवून घ्यावे. वाफ जीरली कि मसूर बाहेर काढावेत आणि डावेने थोडेसे चेचून घ्यावे. आणि १ कप पाणी घालावे.
२) कढईमध्ये तेल गरम करावे. लसूण घालावी आणि कडा ब्राऊन होईतोवर परतावी (जळू देऊ नयेत). लसूण नीट परतली गेली नाही तर आमटीला लसणीचा कच्चट वास राहतो.
३) मोहोरी, जिरे, हिंग, हळद, लाल तिखट आणि कढीपत्ता घालून फोडणी करावी.
४) नारळ घालून काही सेकंद परतावे. आता मसूर घालून ढवळावे. लागल्यास पाणी घालावे. कोकम आणि गोडा मसाला घालावा. आमटीला उकळी काढावी. गूळ आणि मीठ घालून ३ ते ४ मिनिटे मध्यम आचेवर उकळी काढावी.
५) चव पाहून लागेल तो जिन्नस वाढवावा. कोथिंबीर घालून तूप भाताबरोबर आमटी सर्व्ह करावी.
टीप:
१) मसुराला मोडसुद्धा काढू शकतो. मोड काढण्यासाठी मसूर रात्रभर पाण्यात भिजवून ठेवावेत. पाणी निथळून घ्यावे. नंतर सुती कपड्यात घट्ट बांधून उबदार ठिकाणी किमान ८ तास तरी ठेवावेत. मोड आल्यावर वरील पद्धतीनेच आमटी करावी.
Tuesday 30 August 2011
Subscribe to:
Post Comments (Atom)
0 comments:
Post a Comment